VOV4.Bahnar - Kơ sơ̆ ‘năr 30/8, tơ̆ Anih jang kơ ƀok Kơ dră teh đak, Kơ dră teh đak Nguyễn Xuân Phúc hlôi sơng dôm khŭl tơ moi apŭng plĕnh teh vang truh Hop akŏm Jơ nŭm ‘long pơ glang ƀrê Việt Nam, yua đơ̆ng ƀok Jagannath Chapagain, Tổng Thư ký Jơ nŭm ‘Long pơ glang ƀrê - khei tơ ƀang ƀrê apŭng plĕnh teh chĕp kơ̆l. Kơ dră teh đak Nguyễn Xuân Phúc hôn bơ nê kơ ƀok Jagannath Chapagain păng dôm bơ ngai tang mat apŭng plĕnh teh vang truh Hop akŏm XI Jơ nŭm ‘long pơ glang ƀrê Việt Nam.

Kơ dră teh đak Nguyễn Xuân Phúc tơ ƀơ̆p dôm bơ ngai tang măt apŭng plĕnh teh vang truh Hop akŏm Jơ nŭm ‘long pơ glang ƀrê Việt Nam

Kơ dră teh đak lăng ‘lơ̆ng Jơ nŭm, Anih jang ‘long pơ glang ƀrê apŭng plĕnh teh păng dôm teh đak jang hơ dai apŭng plĕnh teh, hlôi tơ gŭm ‘lơ̆ng, đei yua hăm Jơ nŭm ‘long pơ glang ƀrê Việt Nam păng kon pơ lei Việt Nam, mă loi ‘noh jĭ hăm dôm bơ ngai đei ƀôh ƀơm ưh kơ ‘lơ̆ng, bơ ngai răm đơ̆ng tơ blăh vang sơ̆, bơ ngai răm đơ̆ng tŏ ‘mi kial pơ răm, jĭ hơ buh âu ki. Ƀok Nguyễn Xuân Phúc tơ băt, Việt Nam pŭ ƀơm ưh kơ ‘lơ̆ng kơ tang đơ̆ng tơ plih tŏ ‘mi kial, kơ na ‘meh vă Jơ nŭm păng dôm teh đak jang hơ dai apŭng plĕnh teh tơ gŭm đĕch dôm tơ drong jang lơ̆m tơ drong jang ‘nâu, vă tơ gŭm kon pơ lei tơ jur ƀơm ưh kơ ‘lơ̆ng, hơ dai hăm jang kiơ̆ tơ drong hơ găt vei lăng cham char, tơ jur râm rĕk nhươ̆.

Thuem: Tơ blơ̆