VOV4.Bahnar - Kơ sơ̆ 9/8, tơ̆ Anih jang kơ ƀok Kơ dră tĕh đak, Kơ dră tĕh đak bơ̆n Nguyễn Xuân Phúc sơng pơ ma nuh hăm Đại tướng Hun Manet, Phŏ Kơ dră chĕp kơ̆l Khul linh, Yŏng vei lăng khul linh tơ blăh tơ̆ kông kơ tĕh đak Campuchia, Kơ dră jang lơ̆m Khul kơ dră chĕp kơ̆l Trung ương Đảng Kon pơ lei Campuchia oei hơ pong tơ̆ Việt Nam. Kơ dră tĕh đak Nguyễn Xuân Phúc hơ iă kơ Đại tướng Hun Manet năm hơ pong, bơ̆ jang tơ̆ Việt Nam; lui ‘măng năm hơ pong gĭt kăl  âu gô tơ gop ‘lơ̆ng ăn tơ drong jơ nei đơ̆ng "Sơ năm tơ bôl Việt Nam - Campuchia 2022".

Kơ dră tĕh đak Nguyễn Xuân Phúc sơng Phŏ Kơ dră chĕp kơ̆l khul linh tĕh đak Campuchia Hun Manet

Pơ ma hơ dăh Việt Nam păng Campuchia jĭ 2 tĕh đak jê̆ băl đei tơ drong pơ vei ‘lơ̆ng hơ iă đơ̆ng sơ̆, Kơ dră tĕh đak Nguyễn Xuân Phúc hơ pơi ‘mĕh Đại tướng Hun Manet, hăm kơ chư̆k jang gĭt kăl hrei ‘nâu kŭm nhen tơ̆ hơ năp kơnh, hơ nơ̆ng tơ gop ‘lơ̆ng ăn tơ drong vei lăng, pơm hơ tŏk tơ drong pơ vei ‘lơ̆ng hơ iă kơ 2 tĕh đak jê̆ băl, pơ vei roi ‘lơ̆ng, jang hơ doi tôm tơ drong , kơ jăp đunh đai đơ̆ng 2 tĕh đak.

Dơ̆ng: Tơ blơ̆