VOV4.Bahnar - Ƀlep ƀât năr jŏh ayŏ kơ dŏ xoang dôm hơ drĕch kon kông Việt Nam (19/4), pơ gê 19/4, tơ̆ Anih jang kơ ƀok Kơ dră tĕh đak, Kơ dră tĕh đak bơ̆n Nguyễn Xuân Phúc tơ ƀâp đe kră pơ lei, ƀok pơ gơ̆r pơ lei, ngê̆ nhơ̆n bơ ngai kon kông rơ gei đei lơ tơ drong tơ gop lơ̆m tơ drong chĕp vei, tưk tơ iung tơ drong jŏh ayŏ kơ dŏ xoang so kơ hơ drĕch kon kông.

Kơ dră tĕh đak tơ ƀâp đe kră pơ lei, ƀok pơ gơ̆r pơ lei

Pơ ma lơ̆m jơ tơ ƀâp, Kơ dră tĕh đak Nguyễn Xuân Phúc pơ ma hơ dăh, tơ drong vei lăng năng tông, pơm hơ tŏk tơ drong arih xa găh tơ mam drăm păng jơ hngâm đon ăn kon pơ lei kon kông roi đunh roi bơ̆ jang ‘lơ̆ng păng roi tŏk, mă loi jĭ dôm tơ drong jang vei lăng păng tưk tơ iung kơ jă kăp gĭt đơ̆ng jŏh ayŏ kơ dŏ xoang kơ dôm hơ drĕch kon kông, năng tơ drong jŏh ayŏ kơ dŏ xoang kơ dôm hơ drĕch kon kông jĭ 1 păh ưh gơ̆h tơ plĕh lơ̆m tơ drong jŏh ayŏ kơ dŏ xoang Việt Nam.

Kơ dră tĕh đak hơ pơi ‘mĕh đe kră pơ lei, ƀok pơ gơ̆r pơ lei, ngê̆ nhơ̆n, bơ ngai đei bưng ai tih gơ̆h hơ gei hơ nơ̆ng tơ ƀôh trong chong glung ăn kon sâu păng tơ pôl; jĭ bơ ngai jang ‘lơ̆ng lơ̆m rim tơ drong tơ̆ tơ ring, hơ nơ̆ng krao hơ vơn kon pơ lei chĕp vei kơ jăp dôm tơ drong juăt ‘lơ̆ng hơ iă đơ̆ng sơ̆, adrin jang xa kơ dih, tơ guăt 1 ƀơ̆r đon. Kơ lih yoa kiơ̆ kơ Ƀok Kơ dră tĕh đak, kiơ̆ đơ̆ng tơ drong jŏh ayŏ kơ dŏ xoang, oei xa hơ dai roi ‘lơ̆ng, roih hlôh vao, roi ‘mêm băl, vang tơ gop tưk tơ iung jơ hngâm pran ăn Việt Nam, kơ jă kăp gĭt đơ̆ng Việt Nam ăn hrei ‘nâu păng ning mônh kơnh.

Dơ̆ng: Tơ blơ̆