VOV4.Bahnar - Lơ̆m dôm năr oei tơ̆ Nhật Bản vang năm pơ dong nhap Thủ tướng Abe Shinzo, ‘năr 27/9, Kơ dră tĕh đak Nguyễn Xuân Phúc đei 1,2 ‘măng tơ ƀâp 2 pang hăm kơ dră chĕp kơ̆l dôm tĕh đak vang năm pơm lêh pơ dong.

Kơ dră tĕh đak Nguyễn Xuân Phúc tơ ƀâp Thủ tướng Campuchia Samdech Techo Hun Sen

Tơ̆ jơ tơ ƀâp hăm Thủ tướng Campuchia Samdech Techo Hun Sen, 2 păh pơ ma hơ dăh ling lang năng kăl păng pơ ‘nhŏ hơ drol hlŏh ăn tơ drong vang vei kơ jăp păng hơ nơ̆ng hơ met pơ ‘lơ̆ng tơ drong pơ vei ‘lơ̆ng hơ iă, jang tơ bôl đơ̆ng sơ̆, jang hơ doi tôm tơ drong, kơ jăp ‘lơ̆ng đơ̆ng 2 tĕh đak. 

Kơ dră tĕh đak Nguyễn Xuân Phúc tơ ƀâp Kơ dră Anih vei lăng Châu Âu Charles Michel

Tơ̆ tơ drong tơ ƀâp hăm Kơ dră Anih vei lăng Châu Âu Charles Michel, Kơ dră tĕh đak tơ chĕng ‘lơ̆ng Trong jang hơ doi gĭt kăl tôm tơ drong Việt Nam-EU, pơ ma hơ dăh Việt Nam năng EU jĭ Grŭp jang hơ doi gĭt kăl tơm dơ nơm kơ Việt Nam; hôn bơ nê EU tơ lĕch lơ tơ drong pơ chĕh rơ gei vă pơm hơ tŏk tơ drong jang hơ doi hăm tơ ring Châu Á - Thái Bình Dương.

VOV-Dơ̆ng: Tơ blơ̆