VOV4.Bahnar - Pơ gê ‘năr 22/9, tơ̆ Anih jang Kơ dră teh đak, ƀok Kơ dră teh đak Nguyễn Xuân Phúc tơ ƀơ̆p muh măt dôm hơ ioh hơ gei, tang măt ăn hơ ioh kơ 54 hơ drĕch hơ drŭng lơ̆m jơ̆p tơ ring kơ teh đak vang akŏm năr pơ gơ̆r tơ ƀơ̆p pơ ma dơ nuh hăm hơ ioh hơ gei kơ dôm hơ drĕch hơ drŭng lơ̆m teh đak ‘măng mă IV pơ gơ̆r lơ̆m năr ‘nâu, ‘năr (23/9).

Tơ̆ jơ tơ ƀơ̆p, Kơ dră teh đak Nguyễn Xuân Phúc pơ ma hơ dăh hlôh hơ dăh đon tơ chĕng đơ̆ng Ƀok Hồ găh tơ goăt 1 jơ hngơ̆m đon đĭ đăng hơ drĕch hơ drŭng, găh tơ drong jang vei lăng hơ ioh, Đảng, teh đak păng kon pơ lei bơ̆n hơ nơ̆ng bơ ngơ̆t truh, lăng kăl tơ drong jang vei lăng păng pơ tho pơ hrăm hơ ioh, mă loi ‘noh jĭ hơ ioh kon kông, tơ ring groi kông, tơ ring hơ tăih hơ tŏ, tơ ring sơ lam, achon đak dơ sĭ, đei tơ ƀôh kiơ̆ lơ trong jang tơ gŭm đei tơ lĕch jang kiơ̆ tơ tom, đei yua.

Kơ dră teh đak pơ ma hơ dăh, hăm vă jê̆ 16 triệu đội viên, hơ ioh păih iung, hơ ioh iĕ, ‘nâu jĭ bơ ngai tơ ‘ngla tơ̆ hơ năp kơnh kơ teh đak, yua thoi noh Kơ dră teh đak ‘meh vă đe oh hơ ioh hŏk pơ hrăm pơ nam, pơ tâp hơ kâu jăn vă đei tôm đon hơ gei păng jơ hngơ̆m pran, pơm tơ drong ‘lơ̆ng kơ jăp ăn tơ drong hơ tŏk tơ iung tơ̆ hơ năp kơnh.

Thuem: Tơ blơ̆