VOV4.Bahnar - Pơ gê ‘năr 17/5, tơ̆ Anih jang ƀok Kơ dră teh đak, Kơ dră teh đak Nguyễn Xuân Phúc tơ ƀơ̆p muh măt Khŭl tang măt bơ ngai đei đe lui yom lơ̆m kon pơ lei kon kông dêh char Tuyên Quang. Tơ̆ jơ tơ ƀơ̆p muh măt, kơ dră teh đak pơ ma hơ dăh, Đảng, teh đak ling lang lăng kăl tơ drong jang vei lăng hơ drĕch kon kông jĭ hơ năp jang kăl lơ̆m tơ drong jang kach mang kơ teh đak bơ̆n, hlôi tơ lĕch jang lơ tơ drong jang tih hơ tŏk tơ iung mŭk drăm - joh ayŏ - tơ pôl, vei sơ đơ̆ng tơ ring kon pơ lei kon kông păng tơ ring groi kông,vă tơ drong tơm hơ met ‘lơ̆ng tơ drong arih sa tơ mam drăm păng jơ hngơ̆m đon đơ̆ng kon pơ lei kơ dôm hơ drĕch kon kông păng hơ drin pơm tơ jê̆ tơ drong hơ tăih găh hơ tŏk tơ iung đơ̆ng tơ ring groi kông păng tơ ring pơ băh.

Tơ̆ hơ năp kơnh, Kơ dră teh đak Nguyễn Xuân Phúc athei rim anih tơm, anih jang păng tơ ring, lơ̆m noh đei dêh char Tuyên Quang akŏm hơ met pơ ‘lơ̆ng dôm tơ drong oei đei, ưh kơ ‘lơ̆ng; tơ mơ̆t dơ̆ng, jang pơ keh trong jang tơ gŭm vă hơ tŏk loi dơ̆ng hơ năp jang đơ̆ng bơ ngai đei đe lui yom lơ̆m tơ ring kon pơ lei kon kông, tơ gop pơm kiơ̆ đei yua tơ drong jang vei lăng hơ drĕch kon kông đơ̆ng Đảng păng trong jang tơ gŭm hơ drĕch kon kông đơ̆ng Teh đak hrei ‘nâu.

Thuem: Tơ blơ̆