VOV4.Bahnar - Hơ nơ̆ng tơ drong jang năm bơ̆ jang tơ̆ An Giang, pơ gê ‘năr 18/1, tơ̆ pơ lei tơm Long Xuyên, Kơ dră teh đak Nguyễn Xuân Phúc vang pơm lêh tơ lĕch jang tơ drong jang tơ mơ̆t jên jang ming man trong tơ ƀưh trong gre tih 91 păng trong gre ver pơ lei tơm Long Xuyên. ‘Nâu jĭ trong nơ năm mă blŭng kơ Anih tơm vei lăng trong nơ năm  gre kơ dâu đei tơ lĕch jang lơ̆m sơ năm 2022. Tơ drong jang ming man trong tơ ƀưh trong gre tih 91 păng trong gre ver pơ lei tơm Long Xuyên đei kơ dih Thủ tướng so Nguyễn Xuân Phúc kĭ ăn tơ drong jang tơ mơ̆t jên jang đơ̆ng sơ năm 2017, oei lơ̆m akŏm tơ drong jang atŭm kơ tơ drong jang tơ klep hơ dai teh tơ hnă Mekong.

Tơ drong jang đei akŏp jên 2.100 ti hlak jên, đei tơ mơ̆t jên jang hăm jên tŏk iŏk đơ̆ng Anih mong jên Hơ tŏk tơ iung Châu Á (ADB) păng 1 păh jên iŏk hơ drol đơ̆ng khŭl kơ dră teh đak Việt Nam, yua đơ̆ng Anih tơm vei lăng găh trong nơ năm gre kơ dâu pơm tơ ‘ngla tơ mơ̆t jên jang. ‘Nâu jĭ tơ drong jang pơm lăp ‘meh vă đơ̆ng prăt 20 sơ năm âu đơ̆ng kon pơ lei An Giang.Kơ dră teh đak Nguyễn Xuân Phúc chhôk hơ iă vang akŏm pơm lêh tơ lĕch jang păng ‘meh vă, ‘nâu jĭ tơ drong jang pơ̆ih blŭng sơ năm 2022 vă đơ̆ng noh hơ nơ̆ng pơ̆ih să dôm tơ drong jang tơ mơ̆t jên jang hloh dơ̆ng pơ đĭ hloi găh trong nơ năm tơ̆ kông, trong đak dơ sĭ, trong đak krong tơ̆ An Giang păng tơ ring tơ măn đak krong Cửu Long, tơ ring 20 triệu ‘nu kon pơ lei hăm đei lơ tơ mam ‘lơ̆ng hơ tŏk tơ iung.

Đơ̆ng rŏng kơ ‘nŏh, kơ sơ̆ 18/1, Kơ dră tĕh đak Nguyễn Xuân Phúc truh pơm lêh et hơ tŏk Hnam kơ măy ot ƀa Hạnh Phúc tơ̆ apŭng Tri Tôn, dêh char An Giang. ‘Nâu jĭ hnam kơ măy đei năng tih hlŏh tơ̆ Châu Á hăm kơ sư̆k ot truh 1.000 tân ƀa 1 năr. Kơ dră tĕh đak Nguyễn Xuân Phúc pơ ma hơ dăh, hăm tơ drong choh jang xa nhen thoi tĕh đak bơ̆n, tơ drong pơ trŭt jang kơ măy pơm tơ lĕch tơ mam ‘nŏh tôch kăl vă pơ jing kơ jă tơ mam kăp, tơ gŭm pơm hơ tŏk tơ drong arih xa ăn kon pơ lei jang chŭn mir. Hơ iă hăm Công ty jang hơ doi Grŭp jang Tân Long et hơ tŏk hnam kơ măy ot ƀa Hạnh Phúc, Kơ dră tĕh đak athei Công ty hơ nơ̆ng tơ rĕk truh kơ sư̆k pơ jei ăn tơ mam tơ̆ anih tĕch mơ dro tơ̆ tĕh đak đe, tơ rĕk truh anih ‘măn răk tơ mam ăn kơ dih hai, jang hơ doi mă ‘lơ̆ng hăm kon pơ lei jang chŭn mir, ưh gơ̆h ep kơ jă ƀa kon pơ lei.

Thuem hăm Dơ̆ng: Tơ blơ̆