VOV4.Bahnar - Hăm jơ hngâm đon chơt hơ iă kơ dôm năr blŭng sơ năm ‘nao Nhâm Dần, tơ băt 92 sơ năm pơ jing Đảng, Kơ dră tĕh đak Nguyễn Xuân Phúc truh akŏm păng iung pơ ma lơ̆m Năr “Pơ yan puih mak jơ̆p lơ̆m tĕh đak” sơ năm 2022. 

Pơ ma tơ̆ âu, Kơ dră tĕh đak Nguyễn Xuân Phúc pơ ma dơ̆ng nơ̆r tơ tă đơ̆ng Ƀok Hô: “Kon pơ lei Yoăn dăh mă Thổ, Mường dăh mă Mán, Jarai dăh mă Rađe, Sêdang dăh mă Bahnar păng dôm hơ drĕch kon kông nai, tơ tă kon sâu Việt Nam ngăl, tơ tă ‘nhŏng ŏh ngăl. Bơ̆n arih dăh mă lôch đei băl, hiôk jơ nap dăh mă mơ mat tat đei băl, phĭ tơ nŏ dăh mă pơ ngot rơ vĕt tơ gŭm băl” păng pơ ma hơ dăh: Tơ drong juăt ‘lơ̆ng hơ iă tôch kăp gĭt đơ̆ng hơ drĕch Việt Nam đei pơ jing yoa đơ̆ng 54 hơ drĕch hơ drung ‘nhŏng ŏh mât mĭnh ƀơ̆r đon, pơ vei tôch kơ jăp.

‘Nŏh jĭ mĭnh tơ drong jŏh ayŏ đơ̆ng sơ̆ đei lơ tơ drong ‘lơ̆ng, drơ̆ng mĭnh nơ̆r găh nơ̆r pơ ma, jĭ 1 tơ mam tôch kăp gĭt kơ hơ drĕch hơ drung bơ̆n. Năng kăl 1 hơ drĕch hơ drung, blŭng a athei năng kăl tơ drong juăt đơ̆ng hơ drĕch hơ drung ‘nŏh ‘mơ̆i. Trong jang găh hơ drĕch hơ drung đơ̆ng Đảng hlôi pơ jing lơ tơ drong ‘lơ̆ng vă vei kơ jăp păng tưk tơ iung tơ drong pha ra băl ‘lơ̆ng hơ iă đơ̆ng jŏh ayŏ kơ dŏ xoang kơ rim hơ drĕch hơ drung, atŭm hăm ‘nŏh pơm ăn tơ drong jŏh ayŏ kơ dŏ xoang kơ dôm hơ drĕch hơ drung mât hơ dai hăm băl pơ jing đei tơ drong jŏh ayŏ kơ dŏ xoang Việt Nam kơ jăp ‘lơ̆ng păng ang hơ dăh. 

Dơ̆ng: Tơ blơ̆