Dôm xăh Khổng Lào, Hoang Thèn, Mường So đei 30 tơ ring kon pơ lei oei xa, hăm 3.404 unh hnam, đei 05 hơ drĕch hơ drung ‘nŏh Yoăn, Thái, Dao, Mông, Dáy vang arih xa hơ dai. Kon pơ lei tơ̆ tơ ring hơ nơ̆ng hơ tŏk jơ hngâm đon pơ vei, oei xa hơ dai ‘lơ̆ng, jang kiơ̆ rim trong jang đơ̆ng Đảng, tơ drong tơ gŭm, khôi luơ̆t đơ̆ng tĕh đak, nơ̆r pơ kăp tơ̆ pơ lei pơ la; adrin pơ jei băl choh jang xa, sut pơ đĭ pơ ngot, tơ jur tơ nuh hin; truh dang ei đei 2/3 xăh jang kĕh tơ ring tơ ring ‘nao. Kon pơ lei 3 xăh năng kăl tơ drong chĕp vei păng tưk tơ iung dôm tơ drong lêh, et soi ‘lơ̆ng, adrin jang ‘lơ̆ng trong jang vei lăng sơ đơ̆ng tơ̆ tơ ring...

Pơ ma nuh hăm kon pơ lei, Kơ dră tĕh đak Nguyễn Xuân Phúc pơ ma hơ dăh, mât mĭnh ƀơ̆r đon jĭ mĭnh tơ drong juăt tôch kăp gĭt đơ̆ng hơ drĕch hơ drung Việt Nam; rim bơ ngai athei băt hơ năp jang đơ̆ng kơ dih hăm pơ lei pơ la, tĕh đak; athei đei đon tơ gŭm băl vă rim bơ ngai, rim unh hnam roi đunh roi đei tơ drong arih xa ‘lơ̆ng hơ iă ƀiơ̆. Kon pơ lei mât mĭnh ƀơ̆r đon, oei xa hơ dai, tơ iung pơ jing unh hnam, tơ pôl ưh lăp vă jang atŏk tơ iung mŭk drăm, jang pơm pơ drŏng đĕch, mă oei vă chĕp vei kơ jăp ‘lơ̆ng dôm tơ drong juăt ‘lơ̆ng hơ iă đơ̆ng sơ̆, jơ hngâm đon băt ‘mêm kơ unh hnam, hơ drĕch hơ drung, pơ lung kôn mon kon sâu adrin jang xa, hŏk pơ hrăm gơ̆h hơ gei…