VOV4.Bahnar - Năm truh ‘măng tơ băt 74 sơ năm Năr Ƀok Hô tơ lĕch nơ̆r krao hơ vơn pơ jei băl ‘mêm tĕh đak, 60 sơ năm Năr Khul linh kanh sat kon pơ lei, gơ măng 5/6, ƀlep ƀât tơ băt 111 sơ năm Ƀok Hô năm chă trong dŏng tĕh đak, tơ̆ Hnam jŏh hơ ri hơ xoang bơ̆ jang tơ bôl Việt Xô (Hà Nội), Anih tơm vei lăng Công an pơ gơ̆r Tơ drong jŏh hơ ri, pôk pơ ư Yŏng Công an xăh rơ gei “arih lơ̆m jơ hngâm đon kon pơ lei”.

Truh akŏm păng iung pơ ma nơ̆r pơ ma lơ̆m jơ pơm lêh, Kơ dră tĕh đak Nguyễn Xuân Phúc tơ chĕng ‘lơ̆ng Anih jang Đảng Công an Trung ương, Anih tơm vei lăng Công an hlôi bơ̆ jang ‘lơ̆ng tơ drong Tơ chơ̆t đơ̆ng Anih tơm chinh trĭ găh tơ plih ‘nao, hơ met ming khul kơ dră pơ gơ̆r Anih tơm vei lăng Công an tŏ sĕt bơ ngai, jang rơ gei, đei yoa; păng tơ drong hơ găt kơ sô̆ 42 đơ̆ng Khul kơ dră tĕh đak chih hơ dăh tơ drong pơ jing công an xăh, thĭ trơ̆n chính quy. Kiơ̆ kơ ‘nŏh, khul linh Công an kon pơ lei đei pơ gơ̆r, bơ̆ jang kiơ̆ 4 tăl, hăm trong jang Anih tơm rơ gei, dêh char pran, apŭng kơ jăp tôm tơ drong, xăh vei kơ jăp tơ ring, lơ̆m nŏh hlôi jang đang tơ drong ăn Công an chính quy iŏk jang kơ chư̆k Công an xăh lơ̆m tĕh đak.

Dơ̆ng: Tơ blơ̆