VOV4.Bahnar - Pơ gê 28/8, tơ̆ plt Sầm Sơn, d/c Thanh Hóa, Kơ dră tĕh đak Nguyễn Xuân Phúc truh pơm lêh man Anih ƀlŏk hơ dơ̆r kon pơ lei, kăn ƀô̆, linh păng hŏk tro tơ ring pơ băh năm hŏk pơ hrăm, bơ̆ jang tơ̆ tơ ring găh Tu; Lêh roi tơ băt tơ drong tơ chơ̆t đơ̆ng Thu tươ̆ng tĕh đak chih tơ băt plt Sầm Sơn hlôi jang kĕh tơ drong pơ jing tơ ring tơ rang ‘nao; lêh sơng iŏk Mê đai Bơ̆ jang dơ̆ng mă 3 đơ̆ng Kơ dră tĕh đak hơ păh ăn.

Kơ dră tĕh đak Nguyễn Xuân Phúc truh pơm lêh tơ lĕch man Anih ƀlŏk hơ dơ̆r kơ kon pơ lei, kăn ƀô̆, linh păng hŏk tro tơ ring Pơ băh năm hŏk pơ hrăm, bơ̆ jang tơ̆ tơ ring găh Tu

Kiơ̆ nơ̆r tơ roi lơ̆m jơ pơm lêh, đơ̆ng tŏk bŏk khei 10 sơ năm 1954 truh khei 5 sơ năm 1955, tơ̆ xăh Quảng Tiến, dang ei ‘nŏh phường Quảng Tiến, plt Sầm Sơn, dêh char Thanh Hóa đêi lui pơ jao sơng iŏk hlŏh 47.300 ‘nu kăn ƀô̆, vă jê̆ 7.500 ‘nu hŏk tro, sinh viên păng unh hnam kăn ƀô̆ đơ̆ng tơ ring Pơ băh năm truh. Hrei ‘nâu, pơm kiơ̆ đon hơ pơi ‘mĕh đơ̆ng đe kăn ƀô̆, linh, hŏk tro năm tơ̆ tơ ring găh tu sơ̆, dêh char Thanh Hóa pơ jao ăn plt Sầm Sơn hơ met tĕh vă man Anih ƀlŏk hơ dơ̆r kơ kon pơ lei, kăn ƀô̆, linh păng hŏk tro tơ ring Pơ băh năm hŏk pơ hrăm, bơ̆ jang tơ̆ tơ ring găh Tu.

Pơ ma lơ̆m jơ pơm lêh, Kơ dră tĕh đak Nguyễn Xuân Phúc tơ chĕng ‘lơ̆ng dêh char Thanh Hóa, plt Sầm Sơn hơ met ‘lơ̆ng hlŏh ăn tơ drong Man anih ƀlŏk hơ dơ̆r kơ kon pơ lei, kăn ƀô̆, linh păng hŏk tro tơ ring Pơ băh năm hŏk pơ hrăm, bơ̆ jang tơ̆ tơ ring găh Tu, atŭm hăm ‘nŏh athei bơ̆ jang trŏ hăm năr hơ găt vă gơ̆h tơ mât yoa ƀlep ƀât tơ băt 70 sơ năm kon pơ lei, kăn ƀô̆, linh, hŏk tro tơ ring Pơ băh năm hŏk pơ hrăm, bơ̆ jang tơ̆ tơ ring găh Tu.

Dơ̆ng: Tơ blơ̆