VOV4.Bahnar - Ƀlep ƀơ̆t tơ băt 68 sơ năm Jơ nei Điện Biên Phủ (7/5), ‘năr brei (18/5) tơ̆ pơ lei tơm Điện Biên Phủ, dêh char Điện Biên, Kơ dră teh đak Nguyễn Xuân Phúc vang năm pơm lêh et hơ tŏk Hnam soi kơ lĭnh lôch dŏng teh đak tơ̆ anih tơ blăh Điện Biên Phủ păng tơ lĕch jang tơ drong jang pơ bŭng hnam ‘mêm mơ nat tat, vei lăng sơ đơ̆ng tơ drong arih sa tơ pôl. Pơ ma tơ̆ jơ pơm lêh, Kơ dră teh đak Nguyễn Xuân Phúc kŭp yom ƀlŏk hơ dơ̆r păng tơ ƀơ̆h jơ hngơ̆m băt bơ nê tôch gĭt kăl hăm Kơ dră Hồ Chí Minh pran kơ tang; ƀlŏk hơ dơ̆r kơ Đại tướng Võ Nguyên Giáp, hơ dai hăm ‘noh ling lang chih răk kŏng jang tih tên đơ̆ng đe ƀok yŏng, kang ƀô̆ khŭl linh, hơ druh tơ dăm iung jang, kon pơ lei tơ̆ hơ nih tơ blăh ƀĕnh kơ ƀrơ̆m phao kơ toang, linh păng kon pơ lei lơ̆m teh đak hlôi nuih mơng iung tơ blăh, plang hơ kâu, pơm đei jơ nei Điện Biên Phủ ang hơ dăh.

Pơ ma hơ dăh Đảng, teh đak ling lang bơ ngơ̆t truh pơ gơ̆r bơ̆ jang kiơ̆ ‘lơ̆ng tơ drong jang “ Băt bơ nê”, “ Nhă đak ƀlŏk kơ tu” hăm dôm trong jang tơ gŭm, kơ dră teh đak akhan, Hnam soi kơ linh lôch dŏng teh đak vă akŏm pơ hngol  sĭt kơ đe lĭnh nŭih mơng lôch dŏng teh đak tơ̆ teh Điện Biên, gô jing hơ nih pơm dôm tơ drong lêh soi tơ beh, ƀlŏk hơ dơ̆r kŏng jang đơ̆ng dôm bơ ngai hlôi plang hơ kâu kơ dih ăn teh đak.

Thuem: Tơ blơ̆