VOV4.Bahnar - Kơ sơ̆ ‘năr 15/2, ƀlep ƀơ̆t tơ băt 233 sơ năm jơ nei Ngọc Hồi - Đống Đa (1789-2022), 92 sơ năm năr pơ jing Đảng Cộng sản Việt Nam, dêh char Bình Định pơ gơ̆r lêh et hơ tŏk Hnam soi Tây Sơn Tam Kiệt, hnam soi đei tơ drong ‘lơ̆ng git kăl găh jơ hnơr arih, joh ayŏ, khoa hŏk, tơ klep hăm hơ năn đơ̆ng ƀok pơ tao Quang Trung păng tơ drong jang iung tơ blăh Tây Sơn, lơ ƀok pơ tao Tây Sơn hơ tuch anglŏ 18. Vang akŏm jơ pơm lêh đei Kơ dră teh đak Nguyễn Xuân Phúc kŭm hăm hơ kăn sư, kơ dră chĕp kơ̆l rim anih tơm, anih jang trung ương, tơ ring păng lơ lap kon pơ lei dêh char Bình Định. Pơ ma tơ̆ jơ pơm lêh, Kơ dră teh đak tơ roi 5 ƀai hŏk đơ̆ng Quang Trung - Nguyễn Huệ, ƀok pơ tao gơh hơ gei.

‘Nâu jĭ dôm ƀai hŏk gĭt kăl hăm tơ drong jang khŭl linh, vei lăng sơ đơ̆ng teh đak păng đei dôm tơ drong ‘lơ̆ng hơ iă găh hơ tŏk tơ iung mŭk drăm - tơ pôl ăn Bình Định pơ ma hơ drô̆ păng lơ̆m teh đak pơ ma atŭm.Ƀlep ƀơ̆t ‘măng âu, Kơ dră teh đak athei Đảng bộ khŭl kơ dră păng kon pơ lei dêh char Bình Định kŭm hăm Anih tơm vei lăng găh joh ayŏ, tơ plŏng kơ dâu păng tơ mang lăng, rim anih jang, khŭl jang đei ƀơm truh kăl kơ tơ lĕch jang tơ păt păng đei yua tơ drong jang teh đak vei lăng păng hơ tŏk kơ jăp ‘lơ̆ng kơ jă kăp gĭt Anih grua groa Hnam soi Tây Sơn Tam Kiệt, jăh pơ jing tơ drong jang vei lăng hơ tŏk kơ jăp kơ jă kăp gĭt anih gru groa Teh đak gĭt kăl âu.

Thuem: Tơ blơ̆