VOV4.Bahnar - Gơ măng ‘năr 14/6, dêh char Quảng Bình pơ gơ̆r Lêh roi tơ băt kŏng jang đei ăn kơ ƀok Hồ păng tơ drong joh hơ ri hơ soang tơ băt 65 sơ năm năr ƀok Hồ năm tơ mang tơ̆ Quảng Bình. Pơ ma tơ̆ jơ pơm lêh, Kơ dră teh đak Nguyễn Xuân Phúc roi rơ đăh: Quảng Bình jĭ tơ ring teh akŏm lơ tơ drong joh ayŏ tih kơ hơ drĕch hơ drŭng. Đunh kơ dâu 65 sơ năm, ‘năr 16/6/1957, ƀok Hồ hlôi mơ̆t tơ mang tơ̆ Quảng Bình. Lơ̆m 65 sơ năm bơ̆ jang kiơ̆ nơ̆r pơ tho đơ̆ng ƀok Hồ, mă loi ‘noh jĭ hloh 35 sơ năm jang kiơ̆ trong tơ plih ‘nao, tơ ring teh hlôi pŭ răm yua đơ̆ng ƀôm ƀrơ̆m tơ blăh vang hlôi tơ plih hơ tŏk tơ iung pran kơ tang.

Hơ drol kơ vang pơm lêh tơ băt, Kơ dră teh đak Nguyễn Xuân Phúc soh nhang ƀlŏk hơ dơ̆r kơ ƀok kơ dră Hồ Chí Minh păng đe linh nuih mơng lôch dơ̆ng teh

Đảng bộ, linh păng kon pơ lei Quảng Bình hlôi 1 jơ hngơ̆m đon, hơ drin tôch bơ neh, iŏk đei dôm jơ nei tih tên lơ̆m đĭ đăng dôm tơ drong jang. Dôm jơ nei iŏk đei ‘noh tôch kơ chhôk ‘nă, pơm đei tơ drong kơ jăp ăn dêh char Quảng Bình hơ tŏk tơ iung hrĕnh păng kơ jăp hloh tơ̆ hơ năp kơnh. Tơ̆ lêh tơ băt, dôm bơ ngai tang măt păng lơ lap kon pơ lei lăng đe hơ ri hơ soang  “ Khŏm hơ dai hăm Ƀok yak tŏk ling lang”.

Thuem: Tơ blơ̆