VOV4.Bahnar - Kơ dră tơm jang tơ bôl Bùi Thanh Sơn pơ tơm ‘măng năm tơ mang tơ̆ Hàn Quốc ƀlep ƀơ̆t vang Hop akŏm Kơ dră tơm Tơ drong jang Đông Nam Á đơ̆ng Tổng thư ký Anih jang hơ dai păng hơ tŏk tơ iung mŭk drăm kiơ̆ nơ̆r krao hơ vơn đơ̆ng Tổng thư ký Anih jang hơ dai păng hơ tŏk tơ iung mŭk drăm, đơ̆ng ‘năr 9 truh ‘năr 11/2/2022. Kiơ̆ lơ̆m kơ chư̆k bơ ngai chĕp kơ̆l Anih tơm jang tơ bôl Việt Nam, ‘nâu kŭm jing ‘măng năm tơ mang tơ̆ Hàn Quốc mă blŭng đơ̆ng kơ dră tơm Bùi Thanh Sơn đơ̆ng rŏng kơ đei pôk jang. Tơ drong pơ vei jang hơ dai Việt Nam - Hàn Quốc hơ nơ̆ng đei pơ vei đei yua lơ̆m lơ tơ drong jang, tơ ƀơ̆p pơ ma dơ nuh kơ dră kơ pal, rim kơ dră anih tơm, anih jang, tơ ring đei tơ lĕch jang ‘lơ̆ng nhen tơ mang kơ tă, pơ ma dơ nuh kơ tă, pơ ma hăm điên thoăi, tơ ƀơ̆p tơ̆ ‘ngoăih lơ pang. Việt Nam kŭm jing teh đak tơm lơ̆m Trong jang tơ gŭm trong Pơ băh ‘nao hơ tŏk loi dơ̆ng đơ̆ng Hàn Quốc. 2 teh đak hơ nơ̆ng pơ vei tơ gŭm dih băl, jang hơ dai kơ jăp lơ̆m rim hop akŏm tơ ring păng apŭng plĕnh teh.

Thuem: Tơ blơ̆