VOV4.Bahnar - Kơ dră tơm jang tơ bôl Bùi Thanh Sơn hlôi pơ ma đam hăm Kơ dră tơm jang tơ bôl ‘nao kơ Hàn Quốc Park Jin. Tơ̆ jơ pơ ma đam, 2 ‘nu ƀok kơ dră drơ̆ng nơ̆r jang hơ doi tơ lĕch jang ‘lơ̆ng tơ drong pơ gơ̆r, tơ ƀâp, pơ ma nuh ăn kuan tih păng jơ̆p tơ ring kiơ̆ lơ trong, năng kăl, tưk tơ iung tơ drong jang hơ doi găh khul linh păng dôm trong jang hơ doi 2 pang păng lơ pang; pơ trŭt dôm anih tĕch mơ dro Hàn Quốc hơ tŏk tơ drong tơ mât jên jang găh kơ măy kơ mŏk gĭt kăl hơ dai hăm tơ drong pơ tho tơ ƀôh, pơ truh kơ măy kơ mŏk ăn Việt Nam.

Kơ dră tơm jang tơ bôl Bùi Thanh Sơn pơ ma điên thoăi hăm Kơ dră tơm jang tơ bôl ‘nao kơ Hàn Quốc

Găh tơ drong lơ̆m apŭng plenh tĕh păng tơ̆ tơ ring, 2 păh drơ̆ng nơ̆r hơ nơ̆ng jang hơ doi kơ jăp, tơ gŭm băl mưh sek tơ lang dôm tơ drong lơ̆m apŭng plenh tĕh păng tơ̆ tơ ring mă 2 păh tơ rĕk truh nhen tơ̆ Liên hợp quốc, ASEAN-Hàn Quốc, Mê Công-Hàn Quốc; vei kơ jăp tơ drong rơ ngei, sơ đơ̆ng hiôk hian, jang hơ doi păng atŏk tơ iung tơ̆ tơ ring đak dơ sĭ Biển Đông.

Dơ̆ng: Tơ blơ̆