VOV4.Bahnar - Gơ măng ‘năr 7/3, tơ̆ anih bơ̆ jang Kơ Anih tơm jang tơ bôl, Kơ dră tơm jang tơ bôl Bùi Thanh Sơn hlôi đei jơ pơ ma điên thoăi hăm Kơ dră tơm jang tơ bôl Rumani Bốc đan Au-rét-xcu. Tơ̆ jơ pơ ma điên thoăi, Kơ dră tơm Bùi Thanh Sơn pơ ma hơ dăh Việt Nam lăng kăl păng ‘meh vă hơ nơ̆ng pơm ‘lơ̆ng hloh dơ̆ng tơ drong pơ vei jang tơ bôl joăt joe hloh 70 sơ năm đơ̆ng Việt Nam păng Rumani. Ƀar kơ dră tơm hlôi pơ ma dơ nuh lơ trong jang hơ dăh vă hơ tŏk loi dơ̆ng pơ̆ih să păng pơm ‘lơ̆ng hloh dơ̆ng tơ drong pơ vei jang tơ bôl joăt joe đơ̆ng 2 teh đak, lơ̆m noh đei tơ drong jang hơ dai pơ trŭt dôm ‘măng năm tơ mang đơ̆ng kơ dră kơ pal păng tơ ƀơ̆p pơ ma dơ nuh đơ̆ng rim kơ dră chĕp kơ̆l, pơ vei trong jang tơ gŭm chĭnh trĭ, anih jang hơ dai găh mŭk drăm, mơ dro sa păng tơ mơ̆t jên jang Việt Nam - Rumani, hơ tŏk loi dơ̆ng jang hơ dai lơ̆m rim tơ drong jang joăt joe nhen pơ tho pơ hrăm, joh ayŏ, tơ mang lăng kŭm nhen tŭn pran dôm tơ drong jang ‘nao nhen bơ ngai jang, choh jang sa.

Thuem: Tơ blơ̆