VOV4.Bahnar - Hơ nơ̆ng tơ drong bơ̆ jang tơ̆ dôm dêh char Tây Nguyên, kơ sơ̆ ‘năr 28-4, khŭl bơ̆ jang kơ Anih vei lăng hơ drĕch kon kông yua đơ̆ng Kơ dră tơm, Kơ dră Anih vei lăng hơ drĕch kon kông Hầu A Lềnh pơm kơ dră khŭl hlôi đei jơ bơ̆ jang hăm Anih vei lăng kon pơ lei dêh char Dak Lak găh tơ drong jang vei lăng hơ drĕch kon kông păng bơ̆ jang kiơ̆ trong jang tơ gŭm kon kông; pơ tôch tơ lĕch jang tơ drong jang tơm kơ teh đak hơ tŏk tơ iung mŭk drăm tơ pôl tơ ring kon pơ lei kon kông păng tơ ring groi kông jăl jang 2021-2025 tơ̆ Dak Lak.

Kơ dră tơm, Kơ dră Anih vei lăng hơ drĕch kon kông Hầu A Lềnh pơ ma tơ̆ jơ bơ̆ jang

Đơ̆ng rŏng răp mơ̆ng dôm nơ̆r tơ gop tơ̆ jơ bơ̆ jang, Kơ dră tơm, kơ dră Anih vei lăng hơ drĕch kon kông Hầu A Lềnh lăng ‘lơ̆ng dôm tơ drong hơ drin đơ̆ng dêh char Dak Lak lơ̆m bơ̆ jang kiơ̆ dôm trong jang tơ gŭm hơ drĕch kon kông păng tơ drong bơ̆ jang kiơ̆ dôm tơ drong jang tơm kơ teh đak khei ‘năr âu ki. Kơ dră tơm athei dêh char bơ ngơ̆t hloh dơ̆ng truh dôm kon pơ lei oei sa vă đei dôm trong jang tơ gŭm mă lăp, đei yua ăn kơ rim tơ ring, rim hơ drĕch kon kông, hơ drin pơ jing dôm tơ drong jang tơm.

Thuem: Tơ blơ̆