VOV4.Bahnar - ‘Năr 26/4, Khŭl bơ̆ jang kơ Anih vei lăng hơ drĕch kon kông yua đơ̆ng Kơ dră tơm, Kơ dră anih vei lăng hơ drĕch kon kông Hầu A Lềnh pơm kơ dră khŭl hlôi năm tơ mang, bơ̆ jang tơ̆ xăh Ia Mơr (apŭng Chư Prông, dêh char Gia Lai) găh tơ drong bơ̆ jang kiơ̆, tơ lĕch jang tơ drong jang vei lăng hơ drĕch kon kông lơ̆m khei ‘năr âu ki. Ia Mơr jĭ xăh tơ ring sơ lam kơ apŭng Chư Prông. Lơ̆m xăh đei 5 thôn, pơ lei, hăm 10 hơ drĕch kon kông arih sa, lơ̆m noh bơ ngai Jrai đei hloh 70%. Xăh tŏk bŏk vei lăng hloh 14 rơ bâu hek tar bri păng teh bri ‘long. Xăh tŏk bŏk tŭn pran krao hơ vơn kon pơ lei vang iŏk pơ jao pơ tăm păng vei lăng bri, hơ tŏk tơ iung mŭk drăm choh jang sa - bri ‘long vă hơ tŏk iŏk yua.

Kơ dră tơm, kơ dră Anih vei lăng hơ drĕch kon kông Hầu A Lềnh pơ ma tơ̆ jơ bơ̆ jang hăm xăh Ia Mơr

Kiơ̆ Kơ dră tơm, Kơ dră Anih vei lăng hơ drĕch kon kông Hầu A Lềnh tơ drong jang vei lăng hơ drĕch kon kông tơ̆ Ia Mơr khei ‘năr âu ki iŏk đei 1,2 jơ nei ‘lơ̆ng. Mă lei, yua đơ̆ng teh choh jang sa đơ̆ng kon pơ lei oei răh rai, trong nơ năm oei ưh kơ ‘lơ̆ng, kơ na tơ drong arih sa kon pơ lei oei mơ mat tat. Ƀok Hầu A Lềnh hlôi tơ lĕch hăm tơ ring găh 1,2 trong jang vă hơ tŏk dôm tơ mam ‘lơ̆ng, tơ drong pran, tơ gop tŭn hrĕnh tơ drong jang tơ jur dơ nuh hin, mă loi ‘noh jĭ ŭnh hnam dơ nuh hin bơ ngai kon kông; athei xăh bơ ngơ̆t truh vei răk, tơ ƀăk mong tơ drong ‘lơ̆ng joăt joe hơ drô̆ kơ rim hơ drĕch hơ drŭng tơ klep hăm pơ jing, hơ met ming tơ goăt 1 jơ hngơ̆m đon.

Thuem: Tơ blơ̆