VOV4.Bahnar - Lơ̆m ‘măng năm hơ pong tơ̆ Việt Nam đơ̆ng ‘năr 14-20/3, kiơ̆ nơ̆r krao đơ̆ng Kơ dră tĕh đak Nguyễn Xuân Phúc păng hơ kăn ƀok, pơ gê 15/3, Kơ dră tơm Julius Maada Bio păng hơ kăn ƀok kŭm hăm Khul tang măt ăn tĕh đak Sierra Leone truh ming kơ vang pơ kao, mât lăng lơ̆m pơ sat Ƀok Hô; ming kơ vang pơ kao tơ̆ Rup man tơ băt đe linh nuih mơng lôch tang ăn tĕh đak.

Kơ dră tĕh đak Nguyễn Xuân Phúc tơ ƀâp Kơ dră tơm tĕh đak Sierra Leone, Julius Maada Bio

Kiơ̆ tơ drong vă jang, Kơ dră tĕh đak Nguyễn Xuân Phúc păng Kơ dră tơm Julius Maada Bio vă pơ ma đam, dơ̆ng lăng lêh kĭ pơ kăp jang hơ doi đơ̆ng 2 tĕh đak. Đơ̆ng rŏng kơ ‘nŏh, Kơ dră tơm Julius Maada Bio vă tơ ƀâp Thủ tướng Phạm Minh Chính, Kơ dră Kuô̆k hô̆i Vương Đình Huệ.

‘Măng năm hơ pong tơ̆ Việt Nam đơ̆ng Kơ dră tơm tĕh đak Sierra Leone ‘nŏh jĭ tơ drong ăn khul jang kơ pal pơ ma nuh hăm băl mă blŭng đơ̆ng 2 tĕh đak; atŭm hăm ‘nŏh jing hơ yak tŏk ‘lơ̆ng đơ̆ng 2 tĕh đak ƀât mă dôm tĕh đak châu Phi; lơ̆m nŏh đei Sierra Leone năng kăl tơ drong pơ jing, pơm hơ tŏk tơ drong pơ vei jang hơ doi hăm dôm tĕh đak tơ̆ tơ ring châu Á-Thái Bình Dương, lơ̆m nŏh đei Việt Nam.

Dơ̆ng: Tơ blơ̆