VOV4.Bahnar - Kơ sơ̆ ‘năr 8/4, tơ̆ Hà Nội, Đại tướng Tô Lâm, Bơ ngai jang lơ̆m Anih tơm Chĭnh trĭ, Kơ dră Anih tơm vei lăng Kŏng an hlôi sơng Trung tá Pedro Soca Pascual, tang măt Anih tơm Nội vụ Cuba tơ̆ Việt Nam. Pơ ma tơ̆ jơ sơng, Kơ dră tơm Tô Lâm pơ ma hơ dăh, khei ‘năr âu ki, mă đơ̆ng jĭ hơ buh COVID-19 ƀơm ưh kơ ‘lơ̆ng truh tơ drong jang, trong tơ lĕch jang hơ dai đơ̆ng 2 anih tơm mă lei 2 păh hlôi hơ drin hơ met ‘lơ̆ng mơ mat tat vă tơ lĕch jang đei yua 1,2 tơ drong jang gĭt kăl hăm trong trực tuyến păng kơ tă. Kơ dră tơm Tô Lâm lăng ‘lơ̆ng pơ tôch jang hơ dai đơ̆ng Anih tơm vei lăng Kŏng an Việt Nam păng Anih tơm Nội vụ Cuba lơ̆m khei ‘năr âu ki. Vă pơm ‘lơ̆ng hloh tơ drong pơ vei jang hơ dai đơ̆ng 2 anih tơm, Kơ dră tơm Tô Lâm athei 2 anih tơm hơ nơ̆ng jang kiơ̆ đei yua dôm tơ drong jang hơ dai lơ̆m tơ drong drơ̆ng nơ̆r jang hơ dai đơ̆ng Anih tơm vei lăng Kŏng an Việt Nam păng Anih tơm Nội vụ Cuba kĭ khei 11/2017.

Thuem: Tơ blơ̆