VOV4.Bahnar - Kơ sơ̆ 15/7, tơ̆ plt Đà Lạt, Kơ dră tơm tơ lĕch nơ̆r sơ kơ̆t, tơ mât jên jang Nguyễn Chí Dũng kŭm hăm khul jang đei jơ bơ̆ jang hăm dêh char Lâm Đồng. Jơ bơ̆ jang akŏm hơ len năng dôm tơ drong jang đei lơ̆m 20 sơ năm bơ̆ jang kiơ̆ Tơ drong tơ chơ̆t kơ sô̆ 10 păng 10 sơ năm bơ̆ jang kiơ̆ Nơ̆r tơ chơ̆t kơ sô̆ 12 đơ̆ng Anih tơm Chinh trĭ tơ̆ tơ ring.

Kơ dră tơm tơ lĕch nơ̆r sơ kơ̆t, tơ mât jên jang bơ̆ jang tơ̆ dêh char Lâm Đồng

Kiơ̆ kơ ‘nŏh ăn ƀôh, mŭk drăm dêh char Lâm Đồng jang tŏk pran, ‘lơ̆ng. Tơ drong jang tŏk mŭk drăm jô̆ păh lăp đei 10,4%; thu mong jên tĕh đak đơ̆ng 504 ti lơ̆m sơ năm 2002 tŏk hlŏh 11.000 ti lơ̆m sơ năm 2021; akŏm đĭ đăng jên tơ mât jang kơ tĕh đak sơ năm 2021 đei 27.365 ti, lơ hlŏh 19 ‘măng pơ têng hăm sơ năm 2002. Kŭm hăm ‘nŏh, kơ sư̆k pơ jei đơ̆ng tơ drong jang mŭk drăm tŏk pran, anih jang, trong nơ năm pơ yoa ăn tơ drong jang mŭk drăm, tơ pôl roi ‘lơ̆ng; jang ‘lơ̆ng tơ drong sut pơ đĭ pơ ngot, tơ jur tơ nuh hin, vei sơ đơ̆ng tơ drong arih xa tơ pôl; vei kơ jăp tơ drong sơ đơ̆ng chinh trĭ păng tơ drong sơ đơ̆ng tơ̆ tơ ring.

Dơ̆ng: Tơ blơ̆