VOV4.Bahnar - Kơ sơ̆ 29/3, tơ̆ Hà Nội, Đại tướng Tô Lâm, Kơ dră tơm vei lăng Công an sơng ƀok Vladimir Baravikov, Bơ ngai tang măt ‘nao kơ Belarus tơ̆ Việt Nam truh tơ ƀâp ƀât ‘nao năm jang tơ̆ Việt Nam. Ƀok Kơ dră Tô Lâm hmach thơ thou ăn Bơ ngai tang măt đei jăl jang tơ̆ Việt Nam đei jơ nei ‘lơ̆ng, tơ gop pơm hơ tŏk tơ drong pơ vei đơ̆ng 2 tĕh đak tŏk pran ‘lơ̆ng hlŏh dơ̆ng; hơ pơi ‘mĕh bơ ngai tang măt hơ nơ̆ng tơ gŭm păng pơm gơng tơ ƀưh pơih xă tơ drong pơ vei, jang hơ doi đơ̆ng Anih tơm vei lăng Công an Việt Nam hăm dôm anih jang kơ pal kơ Belarus. 

Ƀok kơ dră Tô Lâm pơ ma hơ dăh, lơ̆m dôm sơ năm âu ki, tơ drong pơ vei jang hơ doi găh chinh trĭ, mŭk drăm, jŏh ayŏ kơ dŏ xoang, tơ pôl, khul linh, vei sơ đơ̆ng tĕh đak... đơ̆ng 2 tĕh đak Việt Nam - Belarus tŏk ‘lơ̆ng hơ nơ̆ng, roi kơ jăp păng roi pran; athei 2 păh hơ nơ̆ng bơ̆ jang hơ doi mă kơ jăp păng tơ gŭm băl lơ̆m dôm hop akŏm apŭng plenh tĕh tơ̆ hơ năp kơnh, vang tơ gop ăn tơ drong rơ ngei, sơ đơ̆ng tơ̆ tơ ring păng lơ̆m apŭng plenh tĕh.

Dơ̆ng: Tơ blơ̆