VOV4.Bahnar - Kơ sơ̆ 7/7, tơ̆ Hà Nội, Đại tướng Tô Lâm, Kơ dră tơm vei lăng Công an sơng Trung tướng Vanthong Kongmany, Kơ dră jang lơ̆m Trung ương Đảng, Phŏ Kơ dră tơm vei lăng Công an Lào ƀlep ƀât năm hơ pong păng bơ̆ jang tơ̆ Việt Nam.

Tơ̆ jơ sơng, Ƀok Kơ dră Tô Lâm ăn tơ băt, mă đơ̆ng 2 tĕh đak oei tơ ƀâp lơ mơ mat tat yoa tơ drong tơ pŏh đơ̆ng jĭ COVID-19, mă lei tơ drong pơ vei gĭt kăl, jang hơ doi tôm tơ drong đơ̆ng 2 tĕh đak Việt Nam - Lào pơ ma atŭm, đơ̆ng Anih tơm vei lăng Công an Việt Nam – Anih tơm vei lăng Công an Lào pơ ma hơ drô̆ oei tŏk ‘lơ̆ng hơ nơ̆ng, roi đunh roi đei yoa.

Ƀar păh hơ nơ̆ng tơ lĕch jang kiơ̆ nơ̆r pơ kăp jang hơ doi vang vei lăng sơ đơ̆ng tĕh đak, vei sơ đơ̆ng tơ pôl; jang hơ doi tơ lĕch lơ trong jang vei lăng sơ đơ̆ng ăn dôm tơ drong kăl, dôm ‘măng năm hơ pong, bơ̆ jang tơ̆ băl đơ̆ng kơ dră chĕp kơ̆l 2 tĕh đak.

Dơ̆ng: Tơ blơ̆