VOV4.Bahnar - Hăm tĕh choh jang xa xă hlŏh 500.000 ha păng kon tơ rong truh 700.000 tŏ, kŭm hăm dôm tơ drong ‘lơ̆ng găh tĕh, tŏ ‘mi kial, Gia Lai đei lơ tơ drong ‘lơ̆ng vă atŏk tơ iung choh jang xa. Choh jang xa kŭm jing tơ drong jang tŏk bŏk đei dêh char Gia Lai pơ jing tơ drong ‘lơ̆ng vă sơng iŏk jên jang. Tơ̆ hop akŏm tơ lĕch trong tơ mât jên jang sơ năm 2022 dêh char Gia Lai ‘nao pơ gơ̆r 21/5 âu ki, ƀok Võ Ngọc Thành- Kơ dră vei lăng kon pơ lei dêh char Gia Lai pơ ma hơ dăh: Dêh char đei trong jang tôch ‘lơ̆ng vă sơng anih tĕch mơ dro tơ mât jên ăn tơ drong choh jang xa. Ƀai apinh jet ƀok Võ Ngọc Thành- Kơ dră vei lăng kon pơ lei dêh char Gia Lai găh tơ drong ‘nâu.

Ƀok Võ Ngọc Thành - Kơ dră vei lăng kon pơ lei dêh char Gia Lai

-Ƀok ăi, khei ‘năr âu ki, dêh char đei jơ nei yă kiơ lơ̆m tơ drong sơng iŏk jên tơ mât ăn tơ drong choh jang xa?

-Ƀok Võ Ngọc Thành: Hăm tơ drong ‘lơ̆ng đơ̆ng tĕh, tŏ ‘mi kial, dôm sơ năm âu ki, hăm lơ trong jang atŏk tơ iung choh jang xa hăm kơ măy kơ mŏk ‘nao, kơ măy pơm tơ lĕch tơ mam đơ̆ng choh jang xa ‘nŏh Gia Lai đei tơ drong tơ plih pran vă sơng iŏk đon tơ rĕk đơ̆ng dôm bơ ngai tơ mât jên jang păng dôm grŭp jang tih chă hơ len năng, vang tơ mât jên jang xa. Đei 1,2 grŭp jang tih, anih tĕch mơ dro tih nhen Doveco, Trường Hải, Hoàng Anh Gia Lai kŭm oei tơ mât jên ăn tơ drong choh jang xa ‘năi. 1,2 anih jang hlôi jang xa nhôn lăng ƀôh tôch đei yoa, pơm ăn lơ anih tơ mât jên jang nai kŭm tơ rĕk truh; atŭm hăm ‘nŏh pơm tơ plih tôch ‘lơ̆ng găh trong choh jang xa, rei pơ tăm tơ̆ dêh char păng pơ jing đei lơ tơ ring pơ tăm tơ mam xă. Lơ̆m nŏh chă đei trong jang hơ doi đơ̆ng jang xa, pơm tơ lĕch truh tĕch mơ dro hăm dôm tơ mam đơ̆ng choh jang xa đei kơ Gia Lai. Iŏk yoa jô̆ păh lăp kơ kon pơ lei, bơ ngai jang roi tŏk; um ai tơ ring tơ rang đei tơ plih 'lơ̆ng, tơ gop tôch đei yoa ăn tơ drong pơ jing tơ ring tơ rang 'nao tơ̆ dôm tơ ring lơ̆m dêh char.

- Khei ‘năr âu ki, Anih jang đảng dêh char păng Dơ nŏ anih vei lăng kon pơ lei dêh char Gia Lai pơ jing tơ drong ‘lơ̆ng yă kiơ vă sơng anih jang tih, anih tĕch mơ dro đơ̆ng tĕh đak đe tơ mât jên jang găh choh jang xa hă ƀok?

-Ƀok Võ Ngọc Thành: Tơ drong tơ chơ̆t đơ̆ng Đảng ƀô̆ dêh char ‘măng mă XVI tơ lĕch 4 tơ drong jang păng đơ̆ng rŏng âu chih tơ lĕch dơ̆ng 1 tơ drong jang nai, jing 5 tơ drong tơm vă jang. Nhôn akhan, ‘nâu jĭ dôm trong jang tih ăn dôm tơ drong jang atŏk tơ iung mŭk drăm păng jing nơ̆r pơ kăp vă Dơ nŏ anih vei lăng kon pơ lei dêh char Gia Lai chih pơ jing trong jang păng tơ drong jang tơ̆ yăn âu mưh jang kiơ̆ tơ drong tơ chơ̆t âu. Tơ drong tơ chơ̆t mă 1 pơ jing Khul jang rơ gei hăm rim anih jang chinh trĭ tơ̆ tơ ring vă pơm lăp hăm tơ drong jang ‘nao. Tơ drong tơ chơ̆t mă 2 găh man anih jang, pơm trong kơ jăp ‘lơ̆ng vă pơ yoa ăn tơ drong atŏk tơ iung choh jang xa. Tơ drong tơ chơ̆t mă 3 hơ tŏk tơ drong sơng iŏk jên tơ mât jang nhen choh jang xa hăm kơ măy kơ mŏk ‘nao, kơ măy kơ mŏk pơm tơ mam, unh hơ yuh rơ gŏh păng chă tơ mang lăng truh sơ năm 2030 (Tơ drong tơ chơ̆t 07-NQ/TU ‘năr 20/2/2022). Tơ drong tơ chơ̆t mă 4 găh atŏk tơ iung rơ gŏh, găh vei lăng păng atŏk tơ iung bri, pơm hơ tŏk yơ̆p bri păng pơ jing tơ drong jang xa ăn kon pơ lei oei xa tơ ter bri. Păng tơ drong tơ chơ̆t mă 5 ‘nao tơ lĕch găh tơ drong tơ plih kiơ̆ kơ măy kơ mŏk sô̆. Hrei ‘nâu, dêh char hlôi tơ lĕch 1,2 tơ drong jang, kiơ̆ đơ̆ng nŏh gô pơ jing 1,2 tơ drong tơ gŭm mă lăp hăm trong tơ mât jên jang, atŏk tơ iung nhen dôm trong tơ gŭm nai vă krao hơ vơn tơ mât jên jang, vă pơ jing đei tơ drong ‘lơ̆ng hlŏh ăn bơ ngai tơ mât jên jang truh păng jang xa tơ̆ dêh char.

Chĕh phe jĭ 1 lơ̆m dôm tơ mam choh jang xa tơm tơ̆ dêh char Gia Lai

- Vă anih choh jang xa tơ̆ Tây Nguyên, lơ̆m nŏh đei anih choh jang xa dêh char Gia Lai jang tŏk tơ găl hăm tơ drong ‘lơ̆ng tơ̆ tơ ring, dêh char hăm đei nơ̆r apinh kiơ hăm trung ương ưh hă ƀok?

-Ƀok Võ Ngọc Thành: Inh tơ chĕng tơ plih trong jang xa, ‘long pơ tăm đơ̆ng tơ ring Tây Nam Bộ truh Tây Nguyên gô jing 1 trong jang tơ̆ hơ năp kơnh. Mă lei pơm thoi yơ vă gơ̆h năm găn kơ̆l ‘nŏh dôm dêh char oei tơ chĕng hơ len kiơ̆ trong jang kơ dih vă tơ guăt jơ̆p tơ ring. Inh tơ chĕng, truh âu kơnh, Anih tơm Chinh trĭ oei chih hơ met vă pơ tôch tơ drong tơ chơ̆t mă X păng XII đơ̆ng Anih tơm Chinh trĭ, atŭm hăm ‘nŏh pơ jing trong jang atŏk tơ iung tơ ring Tây Nguyên. Inh hơ mĕng tơ drong tơ chơ̆t âu gô jing hơ yak tŏk pran ‘nao, nhôn vă tơ chĕng hơ len, tơ lĕch jang ‘lơ̆ng hlŏh tơ drong tơ chơ̆t âu. Pơm thoi yơ vă Tây Nguyên gơ̆h jang tŏk pran kơ jăp tơ̆ hơ năp kơnh, vă iŏk yoa dôm tơ drong ‘lơ̆ng mă Tây Nguyên đei. Mă 2 ‘nŏh kăl đei trong jang hơ drô̆ ăn tơ ring Tây Nguyên. Păng inh hơ mĕng Tơ drong tơ chơ̆t đơ̆ng Trung ương truh âu kơnh hăm Tây Nguyên kŭm nhen ‘nao tơ lĕch ăn tơ ring Tây Nam Bộ brei drou gô pơih trong ăn Tây Nguyên jang tŏk pran ‘lơ̆ng hlŏh.

-Lei a, bơ nê kơ ih hơ!.

Nguyễn Thảo- Hoàng Qui: Chih

Dơ̆ng: Tơ blơ̆