VOV4.Bahnar - Kơ hrĕng tơm ‘long hơ ngo tơ̆ phương 8, plt Đà Lạt (Lâm Đồng) đei đe kŏh phă. Kăl pơ ma ‘nŏh, tơ drong kŏh phă bri âu ưh kơ sĭ vă iŏk ‘long ôh, mă lei vă pơm kiơ ‘nŏh tŏk bŏk đei anih jang kơ pal dăr hơ len pơm hơ dăh. Anih bri ‘long đei đe kŏh phă găh lô A, lô B, Chơ ƀôt 15, tơ ring bri 148B, phương 8, plt Đà Lạt (Lâm Đồng), bri tang găn sar bar yoa Anih vei lăng bri Lâm Viên iŏk vei lăng.

Anih đe kŏh phă bri ‘long hơ ngo

Tơ̆ âu, kơ hrĕng tơm ‘long hơ ngo tih đơ̆ng 20 - 60cm đei kŏh tơ păk rơ gôn rơ gan. Lơ̆m kơ sô̆ âu đei tơm ‘long hla đĭ jô bơih, kŭm đei lơ tơm ‘long hla oei hơ drih, đak kơ tăk ƀât tơm oei lĕch đĕch. Tơ drong kŏh phă bri tam mă băt đei năr yơ, mă lei pơ gê ‘năr 17/5, dôm anih jang kơ pal kơ plt Đà Lạt hlôi truh hơ len năng, vang jô̆ tơm ‘long, chih hla ar vă tơ chă bơ ngai kŏh phă.

Dơ̆ng: Tơ blơ̆