VOV4.Bahnar - Pơgê năr 24/1, Thượng tướng Trần Quang Phương, Kơ iĕng Kơdră chĕp pơgơ̆r Kuô̆k hô̆i hlôi năm ngôi, hmach Têt kang ƀô̆, ƀô̆ đô̆i kơ rim kơđông ƀô̆ đô̆i kŏng ang oei lơ̆m dêh char Bình Định, kŏng nhân tơ̆ mĭnh ƀar hơnĭh jang kmăi kmŏk pơm tơlĕch tơmam drăm kơ dêh char.

Kơ iĕng Kơdră chĕp pơgơ̆r Kuô̆k hô̆i Trần Quang Phương pôk tơmam drăm ăn ŭnh hnam đei iŏk yua ăn tĕh đak

Tơ̆ apŭng Tây Sơn, Kơ iĕng Kơdră chĕp pơgơ̆r Kuô̆k hô̆i Trần Quang Phương hôn bơnê dôm tơdrong hơdrin mă Dơnŏ anĭh Đảng,khŭl Ƀô̆ đô̆i păng kon pơlei iŏk đei lơ̆m khei năr au ki. Kơ iĕng Kơdră chĕp pơgơ̆r Kuô̆k hô̆i athei tơring hơnơ̆ng jang kiơ̆ tơgoăt mĭnh ƀơ̆r đon, jang kiơ̆ ‘lơ̆ng hrơp mĭnh ‘măng rim tơdrong jang vă atŏk tơ iung tơring, sơđơ̆ng erĭh sa tơpôl. Ƀlep jơ ‘năr au, Kơ iĕng Kơdră chĕp pơgơ̆r Kuô̆k hô̆i Trần Quang Phương hlôi năm ngôi, hơlêm jơhngơ̆m đon păng pôk tơmam drăm Têt ăn 50 ŭnh hnam đei iŏk yua ăn tĕh đak, ŭnh hnam dơnŭh tơ̆ tơring Bình Thành, apŭng Tây Sơn; Năm ngôi, hmach Têt păng pôk tơmam drăm ăn 100 ‘nu kŏng nhân Kŏng ty Tanh mei Able Việt Nam tơ̆ Hơnĭh jang Kmăi kmŏk Phú Tài; Năm ngôi păng hmach Têt Trung đoàn Cảnh sát cơ động- Dơnŏ anĭh tơm Kŏng ang.

Tơblơ̆ nơ̆r: Amazưt