VOV4.Bahnar - Lăng trŭh Tơbăt 75 sơnăm Năr Bơngai rơka -Lôch dŏng tĕh đak (27/7/1947 - 27/7/2022), pơgê năr 10/6, tơ̆ Hơnĭh bơ̆ jang Kơdră chĕp pơgơ̆r Tĕh đak, Kơ iĕng Kơdră chĕp pơgơ̆r Tĕh đak Võ Thị Ánh Xuân sơng pơma dơnŭh hăm Khŭl bơngai đei iŏk yua ăn tĕh đak dêh char Dak Nông ƀlep lơ̆m jơ ‘năr khŭl năm tơmang Hơnĭh tơm Hà Nội păng năm mơ̆t hơpong pơsat Ƀok Hô.

Kơ iĕng Kơdră chĕp pơgơ̆r Tĕh đak Võ Thị Ánh Xuân pôk tơmam drăm ƀlŏk hơdơ̆r ăn dôm bơngai đei iŏk yua ăn tĕh đak dêh char Dak Nông

Hrei au dêh char Dak Nông đei hlŏh 13.000 ‘nu bơngai đei iŏk yua ăn tĕh đak, lơ̆m au đei sa jên khei hơnơ̆ng ‘nŏh 3.000 ‘nu. Hăm trong bơ̆ jang tơgŭm djru đơ̆ng Đảng păng Tĕh đak, tơdrong jang pơ đĭ kon pơlei vang vei lăng năng tông bơngai rơka dŏng tĕh đak, ŭnh hnam đei bơngai lôch dŏng tĕh đak, dôm bơngai đei iŏk yua ăn kĕch mang kơ dêh char iŏk đei lơ tơdrong jơnei, atŏk kơtang jơhngơ̆m pran kon pơlei. Tơdrong erĭh sa kơ dôm ŭnh hnam au đei sơđơ̆ng dơ̆ng kơ jăp. Pơma dơnŭh hăm khŭl tang măt ‘nŏh dôm bơngai đei iŏk yua ăn kĕch mang dêh char Dak Nông, Kơ iĕng Kơdră chĕp pơgơ̆r Tĕh đak Võ Thị Ánh Xuân pơma tơbăt jơhngơ̆m đon hôn bơnê dôm bơngai đei iŏk yua ăn tĕh đak kơ dêh char Dak Nông, hơpơi ‘mĕh vă dêh char hơnơ̆ng tơgoăt tơgoăl kơ jăp, ‘mêm kơ eng tĕh đak đơ̆ng kon pơlei rim hơdrung Tây Nguyên vang kơrŭn jơhngơ̆m tơ iung pơjing pơlei pơla jang kiơ̆ ‘lơ̆ng 2 tơdrong tơm ‘nŏh tơ iung pơjing păng vei lăng tĕh đak, adoi hơnơ̆ng lăng ba kơ jăp jang kiơ̆ ‘lơ̆ng trong bơ̆ jang tơgŭm djru dôm bơngai đei iŏk yua ăn tĕh đak, vă pơtho tơbăt ăn jơhngơ̆m đon ‘mêm kơ eng tĕh đak, tơdrong joăt ‘lơ̆ng hơ iă kơ hơdrĕch hơdrung bơ̆n hăm tơpôl.

Tơblơ nơ̆r: Amazưt