VOV4.bahnar - Pơgê năr 17/6,  Kơ iĕng Kơdră chĕp pơgơr Tĕh đak Võ Thị Ánh Xuân sơng pơma dơnuh hăm Khŭl drŏ kăn vơ̆r gre Trường Sơn. Khei 12/1968, Khŭl kơdră chĕp pơgơ̆r Đảng Dơnŏ anĭh tơm Ƀô̆ đô̆i Trường Sơn hlôi tơchơ̆t pơjing dơnŏ anĭh Drŏ kăn vơ̆r gre Trường Sơn vă tơgŭm djru ăn khŭl bơ̆ jang vei lăng ‘măng sơlam tĕh đak.

Kơ iĕng Kơdră chĕp pơgơ̆r tĕh đak pôk tơmam drăm ăn rim drŏ kăn vơ̆r gre Trường Sơn

Iung pơma tơ̆ jơ tơ ƀơ̆p, tang măt ăn Kơdră chĕp pơgơ̆r Đảng, Tĕh đak, Kơ iĕng Kơdră chĕp pơgơ̆r Tĕh đak Võ Thị Ánh Xuân pơtrŭh nơ̆r ƀơ̆r pơma ‘lơ̆ng rŏ hlŏh hăm rim drŏ kăn vơ̆r gre Trương Sơn. Kơ iĕng Kơdră chĕp pơgơ̆r Tĕh đak hôn bơnê dôm tơdrong tơgop păng iŏk đei jơnei tĭh tên đơ̆ng rim Ƀô̆ đô̆i Drŏ kăn vơ̆r gre Trường Sơn lơ̆m ‘măng iung tơblăh Mi dŏng tĕh đak. Kơ iĕng Kơdră chĕp pơgơ̆r Tĕh đak pơma hơdăh, tơdrong plang akau đơ̆ng rim pơmai hlôi tơgop tĭh tên atŭm hơdrech hơdrung iŏk đei jơnei keh kong. Kơ iĕng Kơdră chĕp pơgơ̆r Tĕh đak ‘mĕh vă Dơnŏ anĭh tơm Ƀô̆ đô̆i vei lăng sơlam tĕh đak, Tổng Cục Hậu cần, Dơnŏ anĭh bơ̆ jang găh gre hơnơ̆ng lăng ba kơ jăp, vei lăng năng tông lơ hlŏh dơ̆ng hăm rim drŏ kăn vơ̆r gre Trường Sơn. 

Tơblơ̆ nơ̆r: Amazưt