VOV4.Bahnar - Lơ̆m ‘măng năm bơ̆ jang vang Hop akŏm Kơdră kơpal Khŭl drŏ kăn lơ̆m Plei tĕh sơnăm 2022 (GSW 2022) tơ̆ Thái Lan, Kơ iĕng Kơdră chĕp pơgơ̆r Tĕh đak Võ Thị Ánh Xuân hlôi năm ngôi păng bơ̆ jang tơ̆ dêh char Udon Thani, tơ ƀơ̆p kon pơlei tĕh đak bơ̆n oei tơ̆ Thái Lan păng năm ngôi Trường Khánh An. Tơ̆ ‘măng tơ ƀơ̆p, lăp đơ̆ng rŏng mơ̆ng tơbăt hơdăh dôm tơdrong kơ kon pơlei Việt tơ̆ Thái Lan, Kơ iĕng Kơdră chĕp pơgơ̆r tĕh đak Võ Thị Ánh Xuân hlôi pơma tơbăt jơhngơ̆m đon chơt hơ iă mư̆h đei tơ ƀơ̆p kon pơlei, hôn bơnê kơtang jơhngơ̆m đon tơgoăt tơgoăl, tơgŭm djru dĭh băl kơ kon pơlei, jơhngơ̆m đon tơklep, lăng trŭh pơlei pơla, tĕh đak. Kơ iĕng Kơdră chĕp pơgơ̆r Tĕh đak Võ Thị Ánh Xuân jei hlôi tơroi tơbăt dôm tơdrong lơ̆m tĕh đak hăm dôm tơdrong ‘lơ̆ng hơ iă, tŏk bŏk hơmet pơ ‘lơ̆ng mŭk drăm đơ̆ng rŏng Covid-19; sơkơ̆t hơdăh Đảng păng Tĕh đak ling lang iŏk đei tơdrong lăng ba kơ jăp đơ̆ng kon pơlei Việt Nam oei tơ̆ tĕh đak đe pơma atŭm păng kon pơlei Thái hơdrung Việt pơma hơdrô̆; ‘mĕh vă Khŭl kơdră chĕp pơgơ̆r Khŭl bơngai Việt Nam lơ̆m Thái Lan păng Khŭl kơdră chĕp pơgơ̆r rim khŭl bơngai Thái hơdrung Việt gô roi năr roi iung jang tơnăp hlŏh dơ̆ng, trŏ ƀlep hăm jơhngơ̆m đon hơpơi ‘mĕh vă đơ̆ng kon pơlei lơ̆m rim tơdrong jang tơgoăt tơgoăl, akŏm kon pơlei, pơtho păng hŏk nơ̆r Yuăn, lăng trŭh pơlei pơla, tĕh đak.

Tơblơ̆ nơ̆r: Amazưt