VOV4.Bahnar - Kơsơ̆ năr 13/6, tơ̆ Hơnĭh bơ̆ jang Khŭl kơdră chĕp pơgơ̆r Tĕh đak, Bí thư Trung ương Đảng, Kơ iĕng Thủ tướng Lê Minh Khái, Kơdră chĕp pơgơ̆r Dơnŏ anih chĕp pơgơ̆r vei lăng kơ jă hlôi pơm tơm hop akŏm hăm rim Hơnĭh tơm, hơnih bơ̆ jang găh chĕp pơgơ̆r vei lăng kơ jă mĭnh ƀar tơmam drăm kăl.

Pơma pơtôch tơ̆ hop akŏm, Kơ iĕng Thủ tướng Lê Minh Khái pơma hơdăh, lơ̆m 5 khei blŭng sơnăm, tơdrong tŏk kơ jă tôch kơtang. Tơdrong tơm ‘nŏh kơ yuơ rim tĕh đak tơlĕch jang kiơ̆ vei lăng pơhơi kon jên hu. ‘Ngoăih kơ ‘nŏh, lăp đơ̆ng rŏng vei lăng kĕ jĭ hơbŭh Covid-19, rim tơdrong jang pơm tơlĕch tĕch mơdro đei iung jang dơ̆ng, kơtang tơdrong ‘meh vă răt yua tôch kơtang. Lơ̆m khei năr ‘nŏh, Khŭl kơdră chĕp pơgơ̆r tĕh đak, Thủ tướng tĕh đak păng rim Hơnih tơm, hơnĭh bơ̆ jang, tơring hlôi tơlĕch lơ trong jang hơ iă. Hơlen hơdăh lơ̆m khei năr kơnh, tơdrong tŏk kơ jă oei kơtang đĕch. Mă kăl ‘nŏh kơ jă đak xăng đak dau hơnơ̆ng tŏk kơ jă pơm ăn rim tơmam drăm au to jei tŏk kơ jă mơ̆n. Kơ yuơ lơ lŏh, bơngai jang vei lăng kơ jă đơ̆ng Khŭl kơdră tĕh đak đơ̆ng dang ei trŭh vă đĭ sơnăm tôch mơmat tat. Hăm vei lăng kơ jă mĭnh ƀar tơmam drăm kăl đei ƀơm trŭh tơdrong erĭh sa kon pơlei, Kơ iĕng Thủ tướng tĕh đak athei rim hơnĭh tơm, hơnĭh jang đơ̆ng dang ei trŭh vă đĭ sơnăm, kăl dăr lăng kơ jăp tơdrong pơgơ̆r tĕch mơdro, atŏk kơtang bơ̆ jang tơdra hrô̆ih, vă đei trong jang hơmet pơ ‘lơ̆ng, sơđơ̆ng ăn tơdrong tech răt tơmam drăm tơm pơ yua ăn chŏh jang sa, răt yua, iŏk đei jơnei ƀlep trong tơlĕch jang.

Tơblơ̆ nơ̆r: Amazưt