VOV4.Bahnar - Tơ̆ hơnăp tơdrong dôm năr au, kơ jă mĭnh ƀar tơmam drăm lơ̆m tĕh đak tŏk măt, kơ yuơ kơ jă đak xăng đak dau lơ̆m apŭng plĕnh tĕh tŏk kơtang, năr 14/3 tơ̆ Dơnŏ anih bơ̆ jang Khŭl kơdră tĕh đak, Bí thư Trung ương Đảng, Kơ iĕng Thủ tướng Lê Minh Khái pơm tơm Hop akŏm hăm mĭnh ƀar hơnĭh bơ̆ jang, tơring găh bơ̆ jang chĕp pơgơ̆r kơ jă mĭnh ƀar tơmam drăm kăl nhen đak xăng đak dau, tơmam drăm mam pơsei, phŏng, tơmam drăm chŏh jang sa, tơmam drăm jang pơgang. Iung pơma tơ̆ ‘măng hop akŏm, Kơ iĕng Thủ tướng Lê Minh Khái sơkơ̆t hơdăh, tơdrong vei lăng kơ jăp rim tơmam drăm đei ƀơm kơnê̆ đơ̆ng kơ jă đak xăng đak dau ‘nŏh kăl hlŏh vă tơtom xek tơlang tơdrong pơjĭp atŏk kơ jă ư̆h kơ ƀlep. Kơ iĕng Thủ tướng pơma hơdăh, hăm dôm tơmam drăm tĕh đak tơchơ̆t kơ jă, mă kăl rim tơdrong jang lơ̆m tĕh đak. Hơdrô̆ dôm tơmam drăm mă tĕh đak ư̆h tơchơ̆t kơ jă, kơ iĕng Thủ tướng atheo vei lăng kơ jăp rim tơdrong pơjing kơ jă; dăr lăng kơ jăp dôm tơdrong hlĭch, dôm tơmam drăm đei ƀơm kơtang trŭh tơdrong erĭh sa kơ kon pơlei, mă kăl hăm bơngai dơnŭh. Xek tơlang kơ hret rim bơngai gơ̆t tĕch tơmam drăm vă iŏk đei sa yuơ lơ glăi khôi luơ̆t.

Tơblơ̆ nơ̆r: Amazưt