Kơ iĕng thủ tướng Nguyễn Hòa Bình hmach chơt hơ iă ăn rim hơnih Đảng, Khul kơdră chĕp pơgơ̆r đảng ƀar kâp păng rim kơdră đei pôk hơtŏk, pôk tơmơ̆t păng lui akhan, rim kơdră gô iung jang ‘lơ̆ng hơnăp jang, sơnong jang, tơgăl hăm hơnăp jang đei pơjao, iung jang ‘lơ̆ng tơgŭm kon pơlei, tơgop tơ iung pơjing tơring atŏk tơ iung atŭm hăm lơ̆m teh đak lơ̆m chăl atŏk tơ iung.

Kơ iĕng Thủ tướng Nguyễn Hòa Bình jei athei rim khul kang ƀô̆ dêh char Lâm Đồng ‘nao tĕnh koăng iung bơ̆ jang hloi, tơlĕch jang kiơ̆ jơnei rim trong bơ̆ jang. Athei rim kơdră đei pơjao jang, pôk tơmơ̆t iung jang mă ‘lơ̆ng, tơnăp hloh dơ̆ng hăm tơdrong jang đei pơjao.

Ƀok Y Thanh Hà Niê Kđăm, Bí thư Anih jang Đảng dêh char Lâm Đồng, gơih nơ̆r bơnê gĭt kăl truh Anih tơm Chĭnh trĭ hlôi lui ngeh athei vang jang lơ̆m Khŭl Chĕp kơ̆l pơgơ̆r păng pơjao hơnăp jang pơm Bí thư Anih jang Đảng dêh char. Bí thư  ‘nao kơ dêh char Lâm Đồng pơkăp gô hơtŏk ‘lơ̆ng jơhngơ̆m đon tơgoăt tơgoăl, jang hơdai kơjăp hăm đĭ đăng Khŭl chĕp kơ̆l pơgơ̆r, Khŭl pơgơ̆r Anih jang Đảng dêh char ‘nao păng kơdră chĕp kơ̆l dôm tơring đơ̆ng rŏng kơ tơmơ̆t hơdai, vă hơnhăk dêh char ‘nao hơtŏk tơiung tơgăl hăm tơmam đei hơdrol, pơm lăp hăm tơdrong hơmĕng đơ̆ng Đảng, Teh đak păng Kon pơlei.

Kiơ̆ kơ ‘noh, dêh char gô tơgĕch iŏk yua tôch ai dôm tơdrong đei yua đei kơdih, đei hloi cham char bri kông, đak dơsĭ păng dôm kơjă kăp gĭt joh ayŏ hơdrô̆ kơ dêh char, vă pơjing tơdrong jang hơtŏk tơiung mŭk drăm tơpôl đunh đai. Tơƀôh đon lui tơ̆ hơnăp tơdrong jang kăl âu, ƀok Điểu Minh oei tơ̆ xăh Đức An, dêh char Lâm Đồng pơma:

“‘Năr 1/7 jing 1 dêh char ‘nao, đei lơ hơdrĕch hơdrŭng hơrih sa hơdai, nhen: bơngai M’nông, Yuăn, Êđê, Jarai, K’Ho đang kơ ‘noh  Nùng, Tày păng lơ hơdrĕch hơdrŭng nai dơ̆ng. Găh joh ayŏ joăt joe rim hơdrĕch hơdrŭng đei joh ayŏ pha ra băl, nhen hơri brông, tôn chĭng chêng, soi tơbeh vă lei lăi băl. Tơƀơ̆p hơdai đĭ đăng rim hơdrĕch hơdrŭng tơ̆ dêh char Lâm Đồng vă kơ rim bơngai băt, jô̆ hloi dôm dêh char nai dai băt truh găh joh ayŏ joăt joe kơ bơ̆n”.