VOV4.Bahnar - Tơ̆ Đà Nẵng, pơgê năr 25/7, Kơdră jang lơ̆m Dơnŏ anĭh tơm Chĭnh trĭ, Kơ iĕng Thủ tướng Teh đak Phạm Bình Minh atŭm hăm khŭl bơ̆ jang hlôi năm ngôi, pôk tơmam drăm ăn Hơnĭh rong ‘me dôm bơngai đei iŏk yua ăn kĕch mang, bơngai rơka dŏng tĕh đak tơ̆ Đà Nẵng, hơnĭh tŏk bŏk rong ‘me 48 ‘nu bơngai đei iŏk yua ăn kĕch mang păng unh hnam bơngai lôch dŏng tĕh đak ư̆h kơ đei kôn mon kon sau rong ‘me.

Kơ iĕng Thủ tướng phĭn hơdoi hăm rim ƀok yă tŏk bŏk đei vei lăng năng tông tơ̆ Hơnih rong ‘me dôm bơngai đei iŏk yua ăn tĕh đak kơ Đà Nẵng

Kơ iĕng Thủ tướng Teh đak Phạm Bình Minh hlôi apĭnh jet gia pơma dơnŭh hăm rim đe yă mĕ, rim bơngai rơka; hôn bơnê dôm tơdrong hơdrin đŏng Khŭl kơdră chĕp pơgơ̆r, bơngai jang lơ̆m hơnih au hlôi vei lăng năng tông tơnăp hăm rim bơngai đei iŏk yua ăn teh đak. Kơ iĕng Thủ tướng athei hơnih au hơnơ̆ng vei lăng năng tông, rong ‘me, lăng ba dôm bơngai đei iŏk yua ăn teh đak tŏk bŏk erĭh sa tơ̆ au. Đơ̆ng rŏng ‘nŏh Thủ tướng Phạm Bình Minh atŭm hăm khŭl bơ̆ jang hlôi năm ngôi, pơma dơnŭh hăm mĭnh ƀar ŭnh hnam jang ‘lơ̆ng.

Tơblơ̆ nơ̆r: Amazưt