VOV4.Bhanar - Lơ̆m ‘măng iung năm tơmang păng bơ̆ jang tơ̆ Việt Nam, kơsơ̆ năr 23/2 tơ̆ Hơnĭh bơ̆ jang Khŭl kơdră Tĕh đak, Kơ iĕng Thủ tướng Tĕh đak Phạm Bình Minh hlôi sơng pơma dơnŭh hăm ƀok John Kerry, Bơngai tang măt ăn Ƀok Kơdră tơm Mi. Tơ̆ jơ sơng pơma dơnŭh, Kơ iĕng Thủ tướng Tĕh đak Phạm Bình Minh pơma tơbăt jơhngơ̆m đon chơt hơ iă tơ̆ hơnăp dôm tơdrong atŏk tơ iung ‘nao lơ̆m tơgoăt tơgoăl Jang hơdoi tôm tong Việt Nam - Mi lơ̆m lơ tơdrong, lơ̆m au tĕch mơdro dĭh băl iŏk đei kơ ƀar tĕh đak lơ̆m sơnăm 2021 ‘nŏh 111 ti dolar. Kơ iĕng Thủ tướng hôn bơnê kơtang păng bơnê dôm tơdrong hơdrin păng tơgop đơ̆ng kơ dĭh ƀok John Kerry lơ̆m tơgoăt tơgoăl hle păng pơtrŭt kơtang tơgoăt tơgoăl Việt Nam - Mi lơ̆m dôm jĭt sơnăm au ki; ‘moi kiơ̆ lơ̆m tơdrong đei dang ei, athei ƀar tĕh đak hơnơ̆ng atŏk kơtang tơgoăt tơgoăl jang hơdoi vă pơtrŭt kơtang tơgoăt tơgoăl Việt Nam - Mi atŏk tơ iung sơđơ̆ng, đunh đai, tơpă păng iŏk đei jơnei. Ƀlep lơ̆m jơ ‘năr au, Kơ iĕng Thủ tướng tĕh đak jei bơnê kơ Khŭl kơdră chĕp pơgơ̆r tĕh đak Mi trŭh dang ei hlôi tơgŭm djru Việt Nam akŏp đei 29 trĭu 100.000 kơliêu vaccine tang găn jĭ Covid-19; tơbăt jơhngơ̆m đon ‘mĕh vă Mi hơnơ̆ng tơgŭm djru Việt Namn lơ̆m rim tơdrong jang nhen pơtho pơhrăm, jang pơgang, jang ‘mêm mơnat, jang mŭk drăm kơsô̆ ...

Tơblơ̆ nơ̆r: Amazưt