VOV4.Bahnar - Sơng iŏk nơ̆r krao hơvơn đơ̆ng Khŭl kơdră tĕh đak Cộng hòa Nhân dân Trung Hoa, năr 16/9, Kơ iĕng Thủ tướng Tĕh đak Phạm Bình Minh vang Pơm lêh pơgơ̆r blung a Jơnŭm kơchơ ASEAN - Trung Quốc păng Hop akŏm Kơdră kơpal Mơdro sa tơmơ̆t jên jang ASEAN - Trung Quốc (CAEXPO păng CABIS) ‘măng mă 19 tơ̆ Nam Ninh, Tơring chĕp pơgơ̆r kơ dĭh hơdrung Choang Quảng Tây, Trung Quốc kiơ̆ trong pơtrŭh video. Iung pơma tơ̆ pơm lêh pơgơ̆r blŭng a, Kơ iĕng Thủ tướng tĕh đak Phạm Bình Minh hôn bơnê kơtang tơdrong ƀar păh pơjing Tơgoăt tơgoăl jang hơdoi tôm tong kơ yuơ rơngei hiôk hian, sơđơ̆ng, pơdrŏng hơnŭk hơnoa păng atŏk tơ iung kơ jăp ‘lơ̆ng; ASEAN păng Trung Quốc hơnơ̆ng jing tĕh đak jang hơdoi mơdro sa tĭh tên kơ dĭh băl, hăm akop tĕch mơdro dĭh băl lơ̆m sơnăm 2021 iŏk đei hlŏh 669 ti dolar. Kơ iĕng Thủ tướng Tĕh đak Phạm Bình Minh athei Khŭl kơdră tĕh đak Trung Quốc pơjing rơvơn răt tơmơ̆t lơ hlŏh dơ̆ng tơmam drăm, tơmam drăm choh jang sa ‘lơ̆ng kơ Việt Nam adoi nhen rim tĕh đak ASEAN chơ ba ‘moi kiơ̆ trong tĕh đak Việt Nam; pơtrŭt kơtang jang hơdoi rim tơdrongh tơplĭh ‘nao tơchăr, tơplĭh kơsô̆, mơdro sa điên tư, atŏk kơtang jang hơdoi lơ̆m rim tơdrong rơgŏh ‘lơ̆ng, kơ jăp ‘lơ̆ng.

Tơblơ̆ nơ̆r: Amazưt