Kơ iĕng Thủ tướng Teh đak Phạm Thị Thanh Trà, Kơdră Hơnih Chĕp pơgơ̆r teh đak găh năm tơchă kôch akŏm păng hơlen băt hơdăh hơnăn ƀô̆ đô̆i lôch dŏng teh đak, vang năm păng ra sơkơ̆l tơbăt jơhngơ̆m đon ‘mêm kơ eng yang hơbang rim ƀô̆ đô̆i lôch dŏng teh đak. Lơ̆m jơ pơgơ̆r, rim bơngai tang măt, kang ƀô̆, ƀô̆ đô̆i păng kon pơlei rim hơdrung dêh char Lào Cai ‘măn mĭnh pơnĭt tơbăt jơhngơ̆m đon ‘mêm mơnat, soh hlôt nhang, glơng gơvang pơkao ƀlŏk hơdơ̆r kơ rim ƀô̆ đô̆i nuih mơng lôch dŏng teh đak. ‘Nou jĭ pơtôch đơ̆ng rŏng 4 khei jang kiơ̆ ‘Măng iung jang 500 măng năr năm tơchă, kôch akŏm păng hơlen băt hơdăh hơnăn ƀô̆ đô̆i lôch dŏng teh đak. Khul tơchă kôch akŏm kơ Ƀô̆ đô̆i dêh char Lào Cai hlôi năm tơchă lơ̆m rơbou hektar, tơchă păng kôch akŏm 71 kơting ƀô̆ đô̆i lôch dŏng teh đak, lơ̆m ou hơlen băt hơdăh hơnăn đei 2 kơl ƀô̆ đô̆i lôch dŏng teh đak ‘noh Lý A Tở hăm Triệu Văn Mão.