VOV4.Bahnar -  Kơsơ̆ năr 25/7, tơ̆ Hơnĭh bơ̆ jang Khŭl kơdră tĕh đak, Kơ iĕng Thủ tướng Vũ Đức Đam, Kơdră Khŭl bơ̆ jang kơsô̆ 3 găgh dăr lăng, pơrô̆ pơrôp, hơme pơ ‘lơ̆ng, atŏk kơtang tơlĕch kon jên jang tĕh đak tơmơ̆t jang sơnăm 2022 hlôi bơ̆ jang hăm 17 Hơnĭh tơm, hơnih bơ̆ jang Trung ương, 2 dêh char Cao Bằng, Bắc Kạn găh tơdrong tơlĕch kon jên tĕh đak tơmơ̆t jang. Jô̆ trŭh năr 30/5, tơdrong tơlĕch kon jên jang đơ̆ng 17 hơnĭh jang găh Khul bơ̆ jang kơsô̆ 3 dang 1.585 ti hlak jên, jơnei 8,7% trong tơlĕch jang păng to sĕt hlŏh jô̆ hơtŏ lơ̆m tĕh đak. Jô̆ trŭh năr 22/7, dêh char Cao Bằng tơlĕch kon jên jang tĕh đak jơnei hlŏh 20%, dêh char Bắc Kạn jơnei hlŏh 22%. Tơdrong tơm pơm trŭh tơlĕch kon jên tĕh đak tơmơ̆t jang oei hiơ hiơ̆ kơ yuơ tơplĭh trong jang, trong tơgŭm djru găh jang kiơ̆ pơkăp jang hơdoi ming man, tơdrong vă jang ODA; kơ jă tơmam drăm ming man tŏk măt kơtang, jên hơvơ̆h đe jang jei tŏk măt…pơma pơtôch ‘măng hop akŏm, Kơ iĕng Thủ tướng Vũ Đức Đam athei hơnơ̆ng atŏk kơtang tơlĕch kon jên jang tĕh đak, jang keh đang lơ̆m vă đĭ sơnăm au; hăm trong tơdăh đei kon jên ‘nŏh tơlĕch tơmơ̆t jang hloi. Hăm dôm tơdrong vă jang ayơ pơm hla bơar tim mă keh đang ‘nŏh pơdơ̆h tơlĕch ăn, mă lei lơ̆m jơ ‘năr pơdơ̆h kla ăn ‘nŏh rim tơngla tơmơ̆t jên jang oei hơnơ̆ng tơlĕch jang, dang yơ pơm hla bơar keh đang ‘nŏh ƀơk ăn dơ̆ng.

Tơblơ̆ nơ̆r: Amazưt