Ah 'năr tŏ hlơ hlĕng kơ dôm năr hơtuch khei 6, tơ̆ tơring jang kơtao thôn Thanh Minh, xah Suối Trai, dêh char Đăk Lăk hloh 2ha kơtao kơ ƀok Ale Văn Đăng, 77 sơnăm hlôi koh akŏm đang hloh 1 giĕng kơ ou tŏk bŏk oei 'măn tơ̆ 'nguaih tŏ, pơm kro huach kiơ̆ rim năr. Đơ̆ng rŏng hloh 1 giĕng koh akŏm, kơsô̆ kơtao hlôi kro hloh 1/3. Ƀok Ale Văn Đăng pơngơ̆t kơ đon: "Koh akŏm hloh 10 năr mă ưh đei gre chơ. Krao điê̆n thuăi ăn hơnih jang noh akhan ưh đei gre, hnam kơmăi hư răm. Ƀok kră ou chiu thuơ. Kon inh krao đi#n thuăi lơ 'măng bơih, krao hloi truh tơ̆ xah. Dang ei kơtao kro đĭ bơih, oei yă kiơ dơ̆ng"

Rok kiơ̆ Jăl trong 19C jăl găn dôm xah Suối Trai, Sơn Hòa, Vân Hòa... noh akŏm ƀenh kơtao hlôi koh akŏm đang thoi lĕ akŏm hơnong ƀa. Tơ̆ lơ mir kơtao nai, kơtao hloh kơ khei năr yua 3 khei adoi oei chơ krơ̆ng tơ̆ mir, tam mă băt layơ pơtơm đei iŏk pơkăp koh akŏm. Bơngai pơtăm kơtao ăn tơbăt, tam mă layơ bơngai jang kơtao ƀơm tơnap tap nhen sơnăm ou: "Thoi noh dang ei chă koh akŏm kơnh hăp kro adoi nhen bơ̆n hơna tŏ đĕch bơih. Dang ei hơnơ̆ng sơ̆k tơ̆ tŏ truh dang ei tam mă koh akŏm, kon pơlei băt vơh kơ bu?"

Tơdrong đei ƀôh ou adoi ƀôh lơ hăm lơ kon pơlei jang kơtao tơ̆ dôm tơring pơtăm kơtao gah bro hơlĕch kơ dêh char Đăk Lăk. Kiơ̆ tơdrong chih akŏm tam mă tôm tong, truh hơtuch khei 6, tơ̆ tơring pơtăm kơtao kơ apŭng Sơn Hòa so...đei tŏ sĕt jat noh 6000 ha kơtao tam mă đei koh akŏm, đei đơ̆ng 10-12% teh pơtăm (kiơ̆ kơ tơring). Pơtih nhen tơ̆ xah Sơn Hòa, tơring đei teh pơtăm kơtao să hloh kơ dêh char Đăk Lăk hăm hloh 8.000 ha, truh dang ei đei koh akŏm hloh 7.100ha, adoi oei jê̆ 950 ha tam mă koh akŏm. Tơring hlôi pơm jang hăm hnam kơmăi rŏl sĭk KCP pơdui đunh khei năr rŏl kơtao păng răt tôm kơtao đơ̆ng kon pơlei. Ƀok Nguyễn Duy Tình, Phŏ Kơdră Hơnih jang vei lăng kon pơlei xah Sơn Hòa, dêh char Đăk Lăk ăn tơbăt: "Hăm tơdrong đei ƀôh ou, Hơnih jang vei lăng kon pơlei xah hlôi pơm jang kơtă hăm Khul Kơdră kŏng ti hnam kơmăi rŏl sĭk KCP vă pơm thoi yơ đơ̆ng dang ei truh đĭ khei 7 sơnăm 2026 gô akŏm răt tôm kơtao mă kon pơlei pơtăm đei vă tang găn răm. Ah mă răt yua adar hăp gô pơm tơjur tơdrong pơyua ăn pơyan jang đơ̆ng rŏng"

Pơyan jang kơtao sơnăm ou, bơngai pơtăm kơtao Đăk Lăk ƀơm lơ tơdrong tơnap tap: 'mi kial đak hơbông ah khei tŏk bŏk pơm jang; kơjă kơtao tơjur yuơ sĭk ưh đei tĕch hlot kơlih sĭk răt tơtông lơ hloh; tŏ pơđang đunh khei năr pơm ăn hloh 1.000 ha ƀơm kro honh păng truh hơtuch pơyan jang noh kơ rơbou hectar kơtao adoi oei gô tơ̆ mir... lơ̆m kơplah bơngai chă koh akŏm noh ưh đei lơ păng kăp kiơ̆ kơ năr jang, đơ̆ng 28-30 triu hlj ăn 100 tân kơtao... Minh pơyan kơtao tôch tăng hăm kon pơlei jang kơtao tơ̆ tơring Hơlĕch dêh char Đăk Lăk.