Lơ̆m 6 khei blŭng sơnăm ou, rim jăl jang, rim hơnih jang păng rim tơring hlôi hơvơn đei lơ hơnih jang, vang tơlĕch lơ trong jang vă pơm jang đei jơnei Pơkăp tơlĕch jang. Jơ̆p dêh char hlôi sơng păng akŏm hơdah 500 kơtơ̆ng ang tơbăt gah pơsat linh lôch tang ăn teh đak. Rok kiơ̆ trong Trường Chinh, lơ̆m phương Đăk Cấm păng Kon Tum, khul jang kơpal hlôi chă hơlen, dang ei sir kôch đei 3 kơting linh lôch tang.

Dêh char pơtoi keh đang um groi teh vă băt hơdah, chă sir kôch tơ̆ dôm hơnih kăl loi, vă dah hrôih sơkơ̆t hơdah hơnăn măt linh lôch tang mă tam băt pơlei pơla. Quảng Ngãi hơdrin keh đang tôm tơdrong akŏm kơcheh kơting lơ̆m khei 10/2026.

Dêh char Đắk Lắk tơlĕch tơdrong hơgăt jang đang iŏk kơmâu tơmam hơlen lăng ADN hăm dôm kơ̆l linh lôch tang ăn teh đak tam mă đei băt hơnăn hơdrol kơ ‘năr 31/10 truh. Lơ̆m dêh char dang ei đei 34 pơsat linh lôch tang ăn teh đak hăm 15.222 tŏ pơsat, lơ̆m noh 4.124 tŏ pơsat tam mă đei băt hơnăn, pơlei pơla păng 1.784 tŏ pơsat lăp đei 1 puăt băt pơlei pơla. Truh dang ei, khŭl lĭnh kơpal hlôi tơlĕch jang iŏk kơcheh kơting tơ̆ 5 anih pơsat ƀŭ linh lôch tang ăn teh đak, iŏk đei 105 kơcheh kơting gơh pơyua ăn hơlen lăng ADN.

Hăm tơdrong jang tơchă, kôch iŏk akŏm kơ̆l linh lôch tang ăn teh đak, pơyan tŏ âu ki, Khŭl K51 Anih tơm pơgơ̆r khŭl lĭnh dêh char Đắk Lắk hlôi akŏm đei 27 kơ̆l linh lôch tang ăn teh đak tơ̆ Campuchia. Đơ̆ng rŏng kơ vih tơ̆ teh đak, anih jang hơnơ̆ng hơmet pơ ‘lơ̆ng 12 tơdrong kơtơ̆ng ang păng akŏm dơ̆ng 4 kơ̆l linh lôch tang ăn teh đak tơ̆ dôm xăh Krông Bông păng Tây Sơn.