Tơ̆ jơ bơ̆ jang, bơngai tang măt ăn dôm anih jang athei tơlĕch dôm trong jang nhen hơtŏk tơdrong jang hơdoi đơ̆ng dôm anih jang mă lei athei chih rơđăh bơngai, rơđăh tơdrong jang, rơđăh hơnăp jang, hơtŏk tơdrong iŏk yoa kơmăy kơmŏk roi tơbăt, iŏk yoa kơmăy chih răk kơsô̆ ƀơm truh tơdrong tang găn sar bar, tŏ ‘mi kial kơnê̆, akŏm jơhngâm jang ‘lơ̆ng tơdrong roi tơbăt, tơdra hơdrol đơ̆ng hrôih.

Pơma pơtôch jơ bơ̆ jang, Phó Thủ tướng Hồ Quốc Dũng pơma hơdăh: tơdra hơdrol sơnăm ‘nâu, tŏ ‘mi kial tôch kơnê̆. Tơdrong hiong răm ưh lăp găh tơmam drăm, kon bơngai đĕch mă oei ƀơm ưh ‘lơ̆ng truh tơdrong jang tŏk hai. Phó Thủ tướng athei dôm anih tơm hơtŏk đon kơchăng tơdra hơdrol, đei trong tơjră tơtom, hơmet pơ ‘lơ̆ng tơmam, kơmăy kơmŏk, hơlen năng rim hơnăp jang. Adrol kơ pơyan ‘mi kial truh, pơjing đei dôm khul dăr lăng, chă hơlen dơ̆ng rim trong jang, pơm ‘lơ̆ng ăn dôm trong jang tang găn păng đon kơchăng, tơdrong pơ ‘nhŏ hơdrol hlŏh jĭ vei lăng tơdrong arih păng tơmam drăm ăn kon pơlei.