Tơdrong krao điên thoăi hăt hot đơ̆ng xăh tơring hơtăih yăih hlôi pơih blŭng ăn 1 trong yak gĭt kăl kơ Khul sir chă kơting linh lôch tang ăn teh đak K51, Anih chĕp kơ̆l pơgơ̆r khul linh dêh char Đắk Lắk. Ƀât tŏk bŏk tơdrong jang "500 măng năr sir chă kơting linh lôch tang ăn teh đak", rim nơ̆r tơroi đơ̆ng kon pơlei jĭ 1 nơ̆r athei đe linh jăh năm jang. Anih truh 'măng mă âu jĭ 1 mir pơgar tơter trong ver găh tơring pơvih ăn kăn kư̆ kăch mang Dinh Điền - xăh Khuê Ngọc Điền so, dang ei 'nŏh xăh Krông Bông – tơring tơblăh vang tôch pơmat tat sơ̆. 

Đơ̆ng rŏng 3km yak trong bơnơ̆ chŭn păng vă jê̆ 1km yak jơ̆ng hoh tŏk kông krang, đe linh truh tơ̆ pơgar cheh phe hơla jơ̆ng kông Chư Yang Sin. Chă plơ̆ tơnglat teh tôch hơlen kiơ̆ nơ̆r roi tơƀôh đơ̆ng kon pơlei, đe 'nhŏng tôch hơiă mưh ƀôh kuăl tăng, tơlei nih nŭn văn chô̆ hơkâu đe linh lôch tang ăn teh đak sơ̆ hlôi bŭk ôm kiơ̆ khei 'năr. Đại úy Nguyễn Duy Thuận, jang lơ̆m Khul K51 tơroi: “Nhôn jang tôch hơlen, iŏk ti, iŏk kơƀay kơ kuơh teh, chă ƀôh lơ sơnĕnh, đang kơ ‘nŏh jĭ ƀlak ao đĭ bŭk bơih, năng mơnat kơ đe mih sơ̆ dêh. 'Nhŏng oh chă ƀôh thoi âu 'nŏh tôch hơiă, lơ̆m jơhngâm ƀôh čhôk 'nă hai.”

Tơdrong tơblăh tôch đunh bơih, mă lei tơdrong ơh sơ ‘ngon păng hơnăp jang hăm dôm bơngai lôch hơchăng oei tam mă tôch ‘mơ̆i. Hăm Đại úy Y Nhai Drao, bơngai đei vă jê̆ 20 sơnăm bơ̆jang sir chă kơting linh lôch tang ăn teh đak, rim ‘măng pel ƀơm kơting đe linh lôch tang ăn teh đak ‘nŏh jĭ 1 ‘măng jơhngâm đon čhôk ‘nă pă băt dang yơ: “Trŏ kơting linh lôch tang ăn teh đak bơih, grŭp nhôn tôch hơiă, ưh kơ đei pha kiơ kơ bơngai lơ̆m hnam. Bơ̆n jĭ kon sâu athei năm bơ̆ jang, 1 păh ‘nŏh jang kiơ̆ nơ̆r athei đơ̆ng plei nuih... Kơdih kâu inh mưh pel ƀơm kơting đe mih ‘nŏh tôch hơiă ưh băt pơma kiơ, mă nhâm kŭm ưh kơ lĕch nơ̆r, lăp bơblơ̆n lĕch đak măt đĕch.”

Tơdrong sir chă tôch ƀăt ‘năr dơ̆ng tơ̆ groi teh lơ̆m bri. Mă hơtuch, khul jang sir chă đei 2 kơ̆l linh lôch tang ăn teh đak, kŭm hăm dôm tơmam nhen kuăl tăng, 1 kơsô̆ tơmam, kơmăy kơmŏk roi tơbăt kŭm hăm lơ tơmam yoa kơdih hlôi bŭk ôm kiơ̆ khei 'năr.  

Kơdŭng tăh mong kơting linh lôch tang ăn teh đak đei đe linh vei lăng tôch ‘lơ̆ng, hăm ƀĕnh jơhngâm kŭp yom. Ƀok Nguyễn Hoàng Quang, Phŏ Kơdră Anih vei lăng kon pơlei xăh Krông Bông, pơma hơdăh đon pơhnŏng: “’Nâu jĭ jơnăr tơm kơ tơdrong jang 500 măng năr. Krông Bông jĭ tơring kăn kư̆ lơ̆m khei ‘năr tơblăh vang sơ̆, tơdrong tơblăh tơ̆ âu sơ̆ tôch krưp krĕnh. Kiơ̆ nơ̆r tơroi đơ̆ng kon pơlei păng tơdrong jang hơdoi đơ̆ng khul K51, nhôn vă hơnơ̆ng hơtŏk tơdrong tơroi, pơm thoi yơ vă gơ̆h đei yoa hlŏh, vă hơnhăk dơ̆ng hơnăn, chơ đe mih ma vih dơ̆ng hăm pơlei pơla, hăm bôl boăl.”

Vă pơvih ăn tơdrong chih hơdăh hơnăn, khul jang kơpal chih akŏm, iŏk kơmẫu hơnĕnh, kơting vă hơlen năng ADN. Đơ̆ng rŏng kơ sir chă đang, 2 kơ̆l linh lôch tang ăn teh đak kŭm hăm dôm tơmam đei chơ vih tơ̆ Pơsat linh Krông Bông. Tơdrong sir chă đei 2 kơ̆l linh lôch tang ăn teh đak ‘nŏh jĭ tơdrong vang jang hơdoi kơjăp đơ̆ng khul linh hăm Khul chĕp kơ̆l đảng, khul kơdră tơring, mă loi jĭ dôm nơ̆r tơroi kăp gĭt đơ̆ng kon pơlei. Rim nơ̆r tơroi, mă đơ̆ng iĕ, tơtă jing tơdrong gĭt kăl vang tơgŭm chă anih ƀŭ linh lôch tang ăn teh đak, vang tơgop chơ ba đe ‘nhŏng vih dơ̆ng hăm bôl boăl păng pơlei pơla.

Dang ei Khul K51 hơnơ̆ng pơih xă anih sir chă tơ̆ tơring kông Đá Đen kiơ̆ đơ̆ng dôm nơ̆r kon pơlei tơroi, hăm đon pơhnŏng sir chă, pôi akŏm tôm kơting linh lôch tang ăn teh đak tơ̆ kơdrăn tơblăh sơ̆, vang tơgop bơ̆ jang ‘lơ̆ng tơdrong tơgŭm ăn khul linh păng tơiung jơhngâm đon "Nhă đak ƀlŏk kơtu", "Tơgŭm ăn bơngai đei kŏng" đơ̆ng hơdrĕch hơdrung.

Tơdrong năm bơ̆ jang 500 măng năr sir chă kơting linh lôch tang ăn teh đak oei hơnơ̆ng pơgơ̆r. Đơ̆ng rŏng kơnh gô đei dơ̆ng lơ tơdrong krao điên thoăi truh tơ̆ tŏk bŏk bri kông. Păng păih kơmăy mơ̆ng, dôm bơngai linh K51 – dêh char Đắk Lắk, hơnơ̆ng pŭ balô, năm jang dơ̆ng. Yoa hăm đe sư, ‘nŏh ưh kơsĭ tơdrong jang hmă đĕch, mă jing nơ̆r athei đơ̆ng plei nuih.