Kơchăng trong hơlĕnh pơdăr trư̆k tuyên roi kơtang tơjê̆ Têt nguyên đán

VOV4. Bahnar - Sa roi vă jê̆ Têt Nguyên đán păng atŭm hăm tơdrong jĭ hơbŭh pơrăm pơm kơnê̆ truh bơngai jang lơ̆m prăt khei năr au ki, ‘nŏh nhen lĕ pơm ăn đe sư sa roi ƀônh pŭh pam hiăh đe hơlĕnh pơdăr kiơ̆ trư̆k tuyên, krao hơvơn twochă jên kiơ̆ rim ư̆ng yŭng, dăh mă tơchă bơngai jang lơ̆m khei ‘năr Têt ... Khei năr tơjê̆ au, đei tôch kơ lơ trong hơlĕnh pơdăr đei chĭh tơbăt, dăh mă pơtrŭh nơ̆r pơma lơ̆m điên thoăi rim bơngai yua điên thoăi, krao hơvơn tơchă tơdrong jang hăm jên khei lơ, tơchă jên oei kơtă lơ̆m hnam, ...Lăp bơngai yua điên thoăi lăp kơtĭt lơ̆m rim trong link gửi pơtrŭh ăn, dăh mă kai tơmơ̆t dôm ư̆ng yŭng tơchă jên mă rim bơngai hơlĕnh pơdăr pơtrŭh ăn, ‘nŏh gô mơ̆t lơ̆m trang web hơlĕnh pơdăr, đei ‘măng iŏk hloi kon jên bơngai yua.

            Nơ̆r tơbăt đei pơtrŭh ăn bơngai yua điên thoăi khei năr tơjê̆ au, hmă hmă đei nơ̆r chĭh tơbăt ăn bơngai yua păng atŭm hăm trong link, vă bơngai yua điên thoăi kơtĭt lơm trong link au. Tơdrong kăl lăng trŭh, mă đơ̆ng nơ̆r tơbăt đơ̆ng hơnĭh jang, mă lei mă tơpă ‘nŏh dôm nơ̆r pơtrŭh ăn au hơlĕnh pơdăr, jei pơm ăn lơ bơngai pŭh ƀơm pơm tơƀô̆h hơdăh dôm tơdrong tai khoan, mư̆h tơnĭt lơ̆m rim trong link au: “ Ĭnh ƀô̆h đe pơtrŭh nơ̆r tơbăt akhan tŏk bŏk răt yua tơ̆ tĕh đak đe, tơdăh kơdĭh ư̆h kơ đei iŏk yua lei dăh kơtĭt lơ̆m trong link kơ Hơnĭh mong jên ‘nŏh, vă pơdơ̆h chă pơtrŭh dĭh băl kon jên răt yua. Ĭnh ngêh tơpă, pơm kiơ̆ păng đơ̆ng rŏng ‘nŏh ĭnh pă gơ̆h mơ̆t lăng lơ̆m tai khoan ĭnh bơih. Jei pŭn ai Tai khoan ‘nŏh ĭnh jei iŏk yua mât khâu OTP, tơdăh ư̆h lei rŏ năng kon jên ĭnh hiong răm đĭ đăng bơih rŏ năng. Đơ̆ng rŏng ‘nŏh ĭnh măh năm tơ̆ Hơnĭh mong jên vă pơm mât khâu plơ̆ng păng tŭk hŭt đĭ rim tơdrong chă pơkăp pơtrŭh ăn dĭh băl ‘nŏh”.

        Tôch lơ trong hơlĕnh pơdăr phara dĭh băl, roi năr roi kơtang hlŏh dơ̆ng rim bơngai hơlĕnh pơdăr tơchă lơ trong vă pơtrŭh ăn rim bơngai yua kơ măi, hăm nơ̆r tơbăt lơ̆m điên thoăi, nơ̆r tơbăt tơ̆ zalo, viber, dăh mă tơƀô̆h tơbăt lơ̆m rim mang tơpôl. Hrei au, rim hơnĭh mong jên jei pơtho tơbăt ăn rim bơngai mong jên kai tơmơ̆t dơ̆ng mât khâu yua 1 ‘măng OTP hăm nơ̆r tơbăt sms, dăh mă mât khâu yua mĭnh ‘măng Smart OTP lơ̆m ưng yŭng kơ Hơnĭh mong jên. Kơ yuơ lơ lŏh, bơngai iŏk yua mư̆h ƀô̆h đei nơ̆r tơbăt đơ̆ng hơnĭh mong jên, tơdăh đei ƀô̆h atŭm hăm trong link ayơ, ‘nŏh ‘nĕ kơtĭt lơ̆m nŏh. Tơdăh bơ̆n lăng đei tơdrong pha pha, lei dăh krao điên thoăi ăn Hơnĭh mong jên hloi. Khŭl pơm yoch mạng tŏk bŏk đei lơ trong pơdăr, lơ̆m au mă kăl đe hăp iŏk dôm tơdrong kơtơ̆ng ang rim bơngai, kơsô̆ điên thoăi, kơsô̆ kăn kươk, kơsô̆ tai khoan hơnĭh mong jên. ‘Nau dôm tơdrong kăl hlŏh, mă khŭl pơm yoch ngăl pơm, vă pơjoă dôm bơngai iŏk yua, nhen nơ̆r hơlen đơ̆ng luơ̆t sư Bùi Sinh Quyền - Khŭl luơ̆t sơ Hà Nội:“Khŭl kơnê̆ pơgơ̆m lơ̆m tơdrong kmăi kmŏk, pơlơ̆m tơdrong lêl kơ kon pơlei păng hăp pơlơ̆m iŏk yua tơdrong jang khôi kluơ̆t mă pơ joă kon pơlei. Kơ yuơ khŭl yoch pơm hơlĕnh hơnĭh jang khôi luơ̆t, tơroi akhan hơnĭh jang dăr lăng a,b,c dăh mă akhan hơnĭh xek tơlang au to vă pơ joă kon pơlei. Lơ lŏh pơm ăn kơ bơ̆n hli tăr văr, kơtơ̆ng nơ̆r pơjoă ‘nŏh kơna pơm kiơ̆, pŭh ƀơm khŭl kơnê̆ hơlĕnh pơdăr”.

        Tơdrong pơm ăn đe băt dôm tơdrong kơtơ̆ng ang kơ dĭh dăh mă đe hơlĕnh pơdăr ‘moi kiơ̆ trư̆k tuyên pơm ăn trŭh đei tơdrong kơnê̆ kơtang, mư̆h dôm tơdrong kơtơ̆ng ang kăl, hô sơ jang pơgang ... răm khŭl kơnê̆ iŏk đei păng athei hrŭ ăn jên. Rim trong link pơtrŭh ăn rim bơngai yua lơ̆m rim kơtơ̆ng ang, email, dăh mă lơ̆m mang tơpôl, đei ‘măng đei hloi mah kơnê̆. Kơ yuơ lơ lŏh, lăp kơtĭt lơ̆m trong link au, mă đơ̆ng bơngai iŏk yua ư̆h kơ đei hiong jên dang ei hloi, mă lei đe hăp hlôi kai tơmơ̆t mah kơnê̆ lơ̆m nŏh bơih bơ̆n ư̆h kơ đei băt hloi. Khŭl kơnê̆ ngăl pơlơ̆m lơ̆m đei tơdrong pơrang jĭ hle, nhen khei năr tơjê̆ au ‘noh jĭ Covid-19, mă bơngai iŏk yua hơlen ‘mĕh băt păng kơtĭt lơ̆m trong link đei mah kơnê̆ pơtrŭh ăn athei ăn jên ‘nŏh bơngai plôih ăn ư̆h kơ đei trong ayơ bơih ‘ngoăih ăn kơ đe hăp kon jên hloi.

         ‘Nao au hlôi đei 2 trĭu ‘nu bơngai, đei hloi hơnăn, email, kơsô̆ điên thoăi, hơnăn mơ̆t, chư kĭ kơsô̆ ... găh lơ bơngai lơm tĕh đak bơ̆n mư̆h vang iŏk yua Onus hlôi răm khŭl kơnê̆ tơbăt tĕch. ‘Nau jing ưng yŭng tơmơ̆t jên jang kơsô̆, mĭnh lơ̆m rim ư̆ng yung tơchă jên trư̆k tuyên tŏk bŏk đei tơbăt kơtang lơ̆m khei năr tơjê̆ au păng tơnap mă băt hơdăh ưng yŭng ayơ tơpă păng ư̆ng yung ayơ hơlĕngh pơdăr. Pơtĭh gia nhen tơdrong ‘nhŏng Hoàng Văn Tùng, bơngai hlôi đei ‘măng tŏk iŏk jên ‘moi kiơ̆ 1 ưng yŭng trư̆k tuyên hăm jên chĕh tôch kơ lơ, mă đơ̆ng pă đei iŏk yua ư̆ng yŭng ră bơih mă lei oei hơnơ̆ng sơng iŏk đei lơ ‘măng tơƀô̆h tơbăt ăn tŏk iŏk jên lơ̆m mang tơpôl, nơ̆r tơbăt sms, trŭh hloi mư̆h mơ̆t lơ̆m web jei đei tơbăt pơtho kai tơmơ̆t ưng iŏk ăn tŏk iŏk jên:“Ĭnh oei hơnơ̆ng ƀô̆h rim kơtơ̆ng ang nơ̆r tơbăt đơ̆ng rim pang ưng yŭng pơtrŭh ăn, vă tơgŭm ăn tŏk iŏk jên. Ba jei pă băt kơtơ̆ng ang ayơ tơpă, ayơ hơlĕnh pơdăr. Hơdrol au ki, ĭnh tŏk iŏk 10 trĭu lơ̆m 2 khei, ‘nŏh, ba jên chĕh hơnơ̆ng mă đĭ hre, mă jên chĕh hăp lơ hlŏh 2 ‘măng, 3 ‘măng hloi, kơna dang ei ba tôch hli hăm ư̆ng yŭng au”.

        Hơnĭh bơ̆ jang vei lăng sơđơ̆ng kơtơ̆ng ang găh Dơnŏ anĭh tơm vei lăng jang Kơtơ̆ng ang păng Pơre nơ̆r jei tơlĕch lơ nơ̆r chă pơkă găh rim tơdrong hơmơt đe pơrăm kơtang mang kơ yuơ đei rim trong tim gan ƀlep ‘nao. Yuơ tơdra hơlau đei trŭh 16% lơ̆m kơsô̆ 68 trĭu ‘nu bơngai iŏk yua Internet hlôi mơ̆t lăng lơ̆m rim trang web khŭl hơlĕnh pơdăr lơ̆m 1 khei, ‘nŏh atum hăm hiong dôm kơtơ̆ng ang kơdĭh, bơngai iŏk yua oei răm hloi khŭl kơnê̆ chă hơlĕnh pơdăr trư̆k tuyên, hiong jên păng ư̆h pă gan lui lơ̆m kmăi kmŏk kơsô̆. Rim tơdrong pơ joă sơđơ̆ng kơtơ̆ng ang oei hơnơ̆ng, pơm ăn bơngai iŏk yua ƀônh pŭh ƀơm nhen nơ̆r tơbăt hơdăh đơ̆ng ƀok Nguyễn Thành Phúc - Kơdră chĕp pơgơ̆r Hơnĭh bơ̆ jang vei lăng sơđơ̆ng Kơtơ̆ng ang găh Dơnŏ anĭh tơm jang vei lăng Kơtơ̆ng ang păng Pơre nơ̆r:“Tơdrong pơm ăn kơ đe băt kơtơ̆ng ang kơ dĭh ‘nŏh kơ yuơ tơngla ư̆h kơchăng, chă tơbăt ăn kơ đe băt kư̆ kă. Tơchơ̆t găh vei lăng năng tông kơtơ̆ng ang kơ dĭh kơ Việt Nam ‘nŏh hlôi đei, mă lei tim mă hơdăh. Tơdrong tĭh tên mă ƀar, ‘nŏh hơlĕnh pơdăr trư̆k tuyên. Hlŏh đơ̆ng Hơnĭh jang vei lăng Sơđơ̆ng Kơtơ̆ng ang dăr lăng hơlen ‘nŏh hlôi đei hlŏh 1 trĭu ‘nu bơngai Việt Nam, ‘nŏh jing 16% ‘nu bơngai iŏk yua Internet tơ̆ Việt Nam mơ̆t lăng lơ̆m rim trang web hơlĕnh pơdăr. Rim trong hơlĕnh pơdăr roi kơtang păng bơngai iŏk yua ƀônh pŭh ƀơm. Lơ̆m sơnăm 2021, lơ̆m apŭng plĕnh tĕh đei 2 trĭu trang web hơlĕnh pơdăr, ‘nŏh Việt Nam hlôi đei trŭh 816 website hơlĕnh pơdăr pơm hơlĕnh hơnĭh mong jên”.

Hơnĭh chĭh ƀai: Ban Thời sự

Bơngai tơblơ̆ nơ̆r: Amazưt