‘Năr brei (22-11), Khŭl tang măt Kuôk hô̆i dêh char Dak Lak pơgơ̆r hop akŏm pơma dơnuh hăm bơngai tăh hla đơ̆ng rŏng ‘măng hop akŏm mă 4, Kuôk hô̆i jăl 15. Bí thư Trung ương Đảng, Kơdră anih krao hơvơn kon pơ lei Trung ương Bùi Thị Minh Hoài hlôi pơma dơnuh hăm bơngai tăh hla tơ̆ apŭng Cư M’gar păng pơlei tơm Buôn Ma Thuột. Tơ̆ dôm hơnih tơƀơ̆p pơma dơnuh, bơngai tăh hla tơƀôh jơhngơ̆m đon chhôk hơ iă tơ̆ hơnăp dôm jơnei iŏk đei tơ̆ ‘măng hop akŏm mă 4, Kuôk hô̆i jăl XV.

Mă loi ‘noh, Kuôk hô̆i hlôi pơdrơ̆ng kiơ̆ Tơdrong tơchơ̆t găh pơlong lăng 1,2 tơdrong jang tơgŭm hơdrô̆ hơtŏk tơiung pơlei tơm Buôn Ma Thuột. Tơ̆ jơ pơma dơnuh, bơngai tăh hla kŭm apĭnh dôm tơdrong ƀơm truh trong jang tơgŭm ăn bơngai đei kŏng, hơmet ‘lơ̆ng dôm tơdrong jang ming man glăi, ƀao hiêm pơgang ăn ŭnh dơnuh hin, tơdrong phŏng ya ưh kơ ‘lơ̆ng ƀơm kơ nê̆ truh iŏk yua ‘lơ̆ng đơ̆ng ‘long pơtăm, trong nơnăm kơ nê̆ kăl kơ đei bơngơ̆t truh tơ mơ̆t jên jang pơm hơmet ming.