Tơ̆ dôm hơnih tơƀơ̆p pơma dơnuh, dôm bơngai lĕch pơjei bơngai tang măt Quốc hội jăl XVI tơroi tơdrong jang, tơroi rơđăh dôm trong vă jang păng pơkăp tơdăh đei bơngai tăh hla lui pôk rơih. Dôm bơngai lĕch pơjei pơma hơdăh tơdrong jang akŏm lơ̆m hơtŏk tơiung mŭk drăm - tơpôl pơlei tơm Huế tơklep hăm chĕp răk păng tơƀăk mong kơjă kăp gĭt joh ayŏ ‘lơ̆ng hơiă; hơmet pơ ‘lơ̆ng dôm tơdrong găh anih jang kăl anih kơdrơ̆m, trong nơnăm, vei sơđơ̆ng tơdrong hơrih sa tơpôl, tơ jur dơnuh hin kơjăp; tơgop bơ̆jang kiơ̆ jơnei Tơdrong tơchơ̆t hop akŏm Đảng bộ pơlei tơm Huế ‘măng mă XVII, jăl jang 2025 - 2030.

Pơma tơ̆ hơnăp bơngai tăh hla, ƀok Lê Hoài Trung tơƀôh jơhngơ̆m đon chơt hơiă ƀơ̆t đei lĕch pơjei tơ̆ pơlei pơla kơdih păng pơma hơdăh hơnăp jang đơ̆ng bơngai tang măt Quốc hội.