Tơ̆ pơ lei tơm Kon Tum, Khŭl bơ̆ jang kơ Anih tơm Khoa hŏk păng Kơ măy kơ mŏk yua đơ̆ng bơ ngai jang lơ̆m Trung ương Đảng, Kơdră tơm Huỳnh Thành Đạt pơm kơdră khŭl hlôi đei jơ bơ̆ jang hăm kơdră chĕp kơ̆l dêh char Kon Tum păng dôm anih jang kơ pal kơ tơ ring găh tơdrong hơ tŏk tơ iung ‘long sâm Ngọc Linh păng tơ mam teh đak sâm Việt Nam mă kăl ‘noh sâm Ngọc Linh. Đơ̆ng rŏng lơ sơ năm vei răk hơ drĕch, truh dang ei dêh char Kon Tum đei hơ găt teh să hloh 1.260hek tar sâm Ngọc Linh hăm akŏp tơ mam jô̆ pơ hlom iŏk đei 213 tấn, tơdrong hơ găt truh sơnăm 2025 akŏp hơ găt teh sâm Ngọc Linh kơ dêh char đei 4.500hek tar.

Pơ ma tơ̆ jơ bơ̆ jang, Kơ dră Anih tơm Khoa hŏk păng Kơ măy kơ mŏk Huỳnh Thành Đạt pơ jao hơ năp jang hơ dăh ăn kơ rim anih jang kơ pal kơ Anih tơm păng athei rim anih jang tơ tĕnh tơ chĕng hơ len tơ lĕch jang kiơ̆. Kơ dră tơm Huỳnh Thành Đạt pơ ma hơ dăh ‘nâu kŭm jing dôm trong jang gĭt kăl păng ‘lơ̆ng vă hơ tŏk tơ iung kơ jăp tơ mam sâm Ngọc Linh.