Kơdră Anih vei lăng kon pơlei dêh char Đắk Lắk hmach thơ thâu kơ khŭl y ƀak si Hnam pơgang Đa khoa Buôn Ma Thuột ƀlep ƀơ̆t Năr Thây pơgang Việt Nam
Thứ sáu, 09:37, 27/02/2026
VOV Tây Nguyên/Thuem tơblơ̆
VOV Tây Nguyên/Thuem tơblơ̆
VOV.Bahnar - Pơgê 26/2, ƀlep ƀơ̆t tơbăt 71 sơnăm Năr Thây pơgang Việt Nam (27/2), Kơdră Anih vei lăng kon pơlei dêh char Đắk Lắk Tạ Anh Tuấn hlôi năm ngôi, pơlung khŭl y ƀak si Hnam pơgang Đa khoa Buôn Ma Thuột. Kơdră chĕp kơ̆l dêh char Đắk Lắk chih iŏk dôm tơgop đơ̆ng hloh 11.500 kang ƀô̆, bơngai jang pơgang lơ̆m dêh char, lơ̆m noh đei 240 kang ƀô̆, bơngai jang kơ hnam pơgang, hăm tơdrong jang vei lăng jơhngơ̆m pran Kon pơlei.
Kơdră Anih vei lăng kon pơlei dêh char thơ thâu kơ đĭ đăng y ƀak si hơnơ̆ng hơtŏk jơhngơ̆m đon jang tơnăp, hơtŏk ‘lơ̆ng khăm hơmet jĭ, pơm lăp hăm ‘meh vă vei lăng jơhngơ̆m pran kon pơlei tơring Buôn Ma Thuột păng tơring tơjê̆.
Đơ̆ng blŭng a dang 100 tŏ giơng bơngai jĭ ƀĭch, truh dang ei hnam pơgang hlôi hơtŏk tơiung jing 280 tŏ giơng; anih jang, tơmam drăm, kơmăy kơmŏk ƀrư̆ ƀrư̆ đei tơmơ̆t jên jang, tơgop pơm tơ jur hrăt hrot ăn hnam pơgang kơpal. Tơ̆ hơnăp ‘meh vă roi ‘năr roi kơ jung găh tơdrong jang gơh hơgei păng anih jang kăl pơgang, kơdră chĕp kơ̆l dêh char ‘meh vă anih jang hơnơ̆ng tơplih ‘nao, hơtŏk ‘lơ̆ng tơdrong jang pơvih pơvăn.
Viết bình luận