Xăh Đưng K’Nớ, apŭng Lạc Dương, dêh char Lâm Đồng đei hlŏh 90% kon pơlei jĭ bơngai kon kông. Kŭm hăm nơ̆r athei teh đak jăh pơm pơkĕh trong Trường Sơn Đông, trong gre dêh char 722 năm klĕch xăh vă hơtŏk tơdrong chơ chuĕn, tĕch mơdro tơmam, tơmât jên man anih jang, kăl loi jĭ chô̆ tơlei unh điên 3 pha pơm ‘lơ̆ng ăn tơdrong choh jang xa păng arih xa, tưk tơiung tơdrong jang mŭk drăm, tơpôl… Bơngai tăh hla tơ̆ âu oei tơrek truh tơdrong vei lăng bri păng dôm tơdrong tơgŭm, gơ̆h xa yoa đơ̆ng bri vă pơm hơtŏk tơdrong arih xa.

Pơma tơ̆ jơ tơƀâp, Kơdră chĕp kơ̆l Ban Nội chính Trung ương Phan Đình Trạc akhan, nơ̆r pơma đơ̆ng bơngai tăh hla tôch tơgăl. Khul tang măt Quốc hội dêh char Lâm Đồng vă athei dôm anih jang, khul grŭp đei ƀơm truh jăh sek tơlang, atŭm hăm ‘nŏh tơchĕng hơlen dơ̆ng dôm trong jang vă pơm ‘lơ̆ng ăn tơdrong arih xa kơjăp ‘lơ̆ng ăn kon pơlei arih gơnang đơ̆ng bri. Ƀlep ƀât ‘măng mă âu, Khul tang măt Quốc hội dêh char Lâm Đồng oei hơpăh 20 tơpu tơmam ăn dôm unh hnam đei kŏng, unh hnam tơnuh, pơmat tat.