Ƀlep ƀơ̆t pơgơ̆r ‘măng hop akŏm mă 4, Kuôk hô̆i XV păng tơbăt 92 sơnăm Năr pơjing Khŭl vei lăng drŏ Việt Nam, kơsơ̆ ‘năr 20/10, tơ̆ Anih bơ̆jang kơ ƀok Kơdră teh đak, Kơdră teh đak Nguyễn Xuân Phúc tơƀơ̆p muh măt drŏ kăn tang măt ‘noh jĭ đe drŏ kăn chĕp kơ̆l, sơ̆ chĕp kơ̆l Đảng, teh đak păng đe drŏ kăn jang lơ̆m Trung ương Đảng jăl XIII, đe drŏ kăn tang măt Kuôk hô̆i jăl XV.

Kơdră chĕp kơ̆l Đảng, Teh đak tơƀơ̆p muh măt đe drŏ kăn tang măt Kuôk hô̆i

Vang truh jơ tơƀơ̆p muh măt đei Thủ tướng Phạm Minh Chính, Kơdră Kuôk hô̆i Vương Đình Huệ, Kơdră so Kuôk hô̆i Nguyễn Thị Kim Ngân. Kơdră teh đak pơma hơdăh, Đảng păng teh đak tôch kơ lăng kăl hơtŏk tơiung kang ƀô̆ drŏ kăn lơ̆m khŭl jang chĭnh trĭ đơ̆ng Trung ương truh tơring, Hla ar kăl hop akŏm, tơchơ̆t Trung ương tă kơ tơroi tôch rơđăh truh tơdrong ‘nâu. Kiơ̆ đơ̆ng rim jăl jang Kuôk hô̆i, đe drŏ kăn ling lang tơƀôh rơđăh jơhngơ̆m đon nuih, hơgei đơ̆ng đe drŏ kăn gơh hơgei, tang măt kơ kon pơlei. Kơdră teh đak athei, kơdră đảng, kơdră tơring, dôm anih tơm, anih jang bơ ngơ̆t truh jang kiơ̆ ‘lơ̆ng, đei yua tơdrong tơlĕch jang kiơ̆ dôm tơdrong hơgăt gah tơdrong jang drŏ kăn, hơtŏk hloh dơ̆ng hơnăp jang đơ̆ng kang ƀô̆ drŏ kăn lơ̆m dôm tơdrong jang mŭk drăm - chĭnh trĭ, tơpôl, mă loi ‘noh jĭ hơnăp jang đơ̆ng đe drŏ kăn tang măt Kuôk hô̆i.