Tơ̆ Gia Lai, Phŏ Thủ tướng Hồ Quốc Dũng vang truh pơm lêh pơgơ̆r mơ̆t hŏk blŭng tơ̆ Hnam trưng teh đak rong jăl mônh păng jăl ƀar Ia Púch. Hnam trưng đei man lơ̆m teh să hloh 5 hek tar, jên pơm vă jê̆ 178 ti hlak jên, đei 26 lăm, pơm lăp hăm ‘meh vă hŏk pơhrăm, ƀĭch oei kơtă păng ƀĭch oei tơ̆ kơ ‘năr ăn kơ vă jê̆ 800 ‘nu hŏk tro, lơ̆m noh đei lơ hŏk tro bơngai Jarai. ‘Nâu jĭ 1 lơ̆m dôm 7 hnam trưng teh đak rong 2 jăl tơ̆ dôm xăh sơlam kơ dêh char Gia Lai ăn tơmơ̆t yua lơ̆m sơnăm hŏk ‘nâu.

Tơ̆ Khánh Hòa, Phŏ Kơdră Quốc hội Nguyễn Khắc Định vang truh pơgơ̆r mơ̆t hŏk blŭng, asong tơmam ăn thây kô păng hŏk tro Hnam trưng teh đak rong  jăl 2 păng jăl 3 Pi Năng Tắc, hăm vă jê̆ 480 ‘nu hŏk tro kon kông. Hơnih ‘nao kơ hnam trưng đei tơmơ̆t jên jang hloh 83 ti hlak jên. ‘Măng âu, 4 hnam trưng jăl 1 tơ̆ Tơring gĭt kăl Trường Sa, dêh char Khánh Hòa kŭm hlôi đei pơgơ̆r mơ̆t hŏk blŭng.